TURA: Assam a·dokrangoni niam gri re·bae kam ka·e cha·enggipa manderang batroroengani a·sel North Garo Hills a·jao me·chik bi·sarang gimarongengani gimin niam gri re·napbaenggipa manderangko bilakbate nirok sandina man·na gita Mendipathar aro Assam a·dokni simao entry-exit check point-ko donchina Mendipathar-ni mande saksa, North Garo Hills a·jani Deputy Commissioner-na sedoataha.
Adita salrangna skang, North Garo Hills-ni me·tra saksako gipin biapni mande saksa rim·gittangangaha ine koborko on·ani ja·man, gipin biaprangoni niam gri re·napbaaniko mikrakbate nirok sandichina North Garo Hills a·jani Deputy Commissioner-ko didiataha.
Iani bidingo North Garo Hills a·jani Deputy Commissioner-na sedoatengon, Mendipathar Railway Station-ni infiltration checkpoint-o name nirok sandianirang dongjaengani a·sel gipin biaprangoni manderang skatang re·napbana gita man·enga aro songni nokni me·chik bi·sarangko badinge cha·na gita rim·gittangani cholrang dongenga ine Mendipathar-ni saksa Timjim K Momin parakataha.
Iandakgipa kamrangko champengna man·na gita aro gipin biaprangoni niam gri re·napbaaniko nirok sandina man·na gita Mendipathar aro Assam-ni simao check point-ko donenba mikrakbate nirikkichina Momin, Deputy Commissioner-ko didiataha.
 |
ReplyForward
|
