BAGHMARA: South Garo Hills a·jani mitam officer-rang, somoi gita kamrangko ka·jaengani a·sel dingtang dingtang kam nangana office-ona re·angenggipa manderang neng·nikanirangko chagrongna nangtokenga ine A·chik Conscious Holistically Integrated Krima (ACHIK), Meghalaya sorkarini Chief Secretary-na badi ka·doatenba, kamtango gisik nangjenggipa officer-rangni kosako nanga gita ja·kurangko de·china dabiangaha.
ACHIK-ni vice president Greneth M Sangma-ni badi ka·doangani gitade, South Garo Hills a·jani mitam officer-rang, antini badiaba badiaba salrango, mongsongbate Sombar aro Sukrobar salrangode office-ona re·anggija dongronga aro iani a·selan kam nangana office-ona re·angenggipa manderang neng·nikanirangko chagrongna nangrongenga.
“South Garo Hills a·jao songdongenggipa manderangni u·iatani gitade, badiaba badiaba department-ni officer-rang, office-rangni re·gija dongengani a·sel kam nangana re·angenggipa manderang, mongsongbate chel·gipa biaprangoni Baghmara-ona re·bana nangenggipa manderangde neng·nikanirangko chagrongna nangtokenga. South Garo Hills a·jao rama jal·langrang namjani a·sel aro gari gorarangba chu·onga gita dongjani gimin chel·gipa biaprangoni Baghmara-ona re·rurana nangenggipa manderangde bilongen neng·nikanirangko chagrongna nanga,” ine Sangma parakataha.
Kamtango gisik nanggijagipa officer-rangni kosako nanga gita ja·kurangko de·china Chief Secretary-ko didiatengon, “Ia officer-rang, kamtangtangko name ka·gija an·tangtangni dormaharangko oke cha·tokenga,” ine ACHIK dolni vice president parakataha.
