TURA: South Garo Hills a·jani Additional Deputy Commissioner (ADC) aro Chokpot-ni Sub-Divisional Officer (Civil) PR Sangma-na transfer on·ako ra·pilchina gita South Garo Hills a·jani A·chik Conscious Holistically Integrated Krima (ACHIK), a·dokni Chief Minister Conrad K Sangma-ko didiataha.
“South Garo Hills-o kam ka·chengaonin ia officer, jolni namroro silroroanina an·tangko on·kange kam ka·aha indiba da·alo ugita dakgipa officer-ko dingtang biapona apjitataniara South Garo Hills a·ja gimiknan dal·bea gimaani ong·gnok,” ine ACHIK Southern Zone-ni dilgiparang, Chief Minister-na sedoatgipa chittio parakataha.
Sorkari officer-rangko iandake kam apjitruraaniko ACHIK raken jegalenga ine janapatengon, “South Garo Hills a·jao songdongenggipa manderangna aro a·jana ia officer-ko apsan biapon dongkuna nangchongmota,” ine ACHIK SZ-ni dilgiparang parakataha.
Ia officer-na on·gimin transfer order-ko den·galpilchina gitaba ACHIK, a·dokni Chief Minister Conrad Sangma-ko didiataha.
Adita salrangna skangsan, Chokpot-ni GSU, FKJGP, AYWO, AHAM, CAVC aro GSMC dolrangba, iani bidingo tom·aniko ong·atangenba, MCS officer sakgniko kam ra·jitna tik ka·aniara kragijani ong·enga ine parakangtokahachim.
Chokpot NGO-rangni parakatani gitade, Chokpot-ni Civil Sub-Division Officer (SDO) Pittingson R Sangma aro Chokpot-ni BDO Jericho N Sangma, ia biapo kam ka·a jasasan ong·kuengpiti indiba uamangni kam ka·anirango ia officer sakgnian, jolo songdongenggipa manderangna name kamrangko dangdike on·angahachim.
