SHILLONG: Gambegre Assembly by-election-na National People’s Party (NPP)-ni gita candidate-ko seokmanahaon, Congress dolba Tura-ni gital MP Saleng A Sangma-ni biapko ra·rikna gita nambatgipa candidate-ko susaatskana tik ka·aha.
Gambegre by-election-na NPP, Chief Minister-ni jikgipa Mehtab Chandee-ko susaatani cholrang dongbatengon, Congress dolba Gambegre seat-ko chepiltaina gita rakbate susana miksonganirang dongskaenga.
Bristibar salo, Meghalaya Congress-ni working president Deborah Marak-ni parakatani gitade, ua West Garo Hills a·jaoni ong·jani gimin Gambegre by-election-o susana nangnikjaenga indiba ia by-election-o uamang nambatgipa candidate-ko susaatskana miksongenga.
Gambegre by-election-na candidate-ko seokanio uamang party-ni dongimin niamrangko ja·rikgen aro susana sikenggipa candidate-rangoniko dorgastorangko ra·gen ine janapatengon, da·o dipet Gambegre by-election-na uamang darangkoba candidate-na seoka dongkuja ine Marak parakataha.
By-election-ode obostarang dingtanggrikaigen ine janapatskaengon, changbrina MLA ong·anggipa aro changsa MDC ong·anggipa Saleng A Sangma baksa Gambegre constituency-ni manderang ong·kuenga ine Marak parakataha.
“Gambegre-ni manderang Saleng Sangma-ko namniktoka aro uko nien Gambegre constituency-ni manderang Congress candidate-ko seokaigen,” ine ua aganaha.
Indake ong·genchimoba Lok Sabha election-o cheaiahani gimin agre ka·dongdugajachina aro ia by-election-ko chena gita rakbate kamrangko ka·china Marak, Congress dolni dilgiparangko didiataha.
Indita bilsirangni ja·man Shillong Lok Sabha constituency-o amako man·ahani gimin uamang party-ni gita nipilanirangko dakanggen ineba MPCC-ni working president parakataha.
Adita salrangna skang ong·atanggipa Lok Sabha election-o Congress dolni candidate Saleng A Sangma, NPP-ni candidate aro Tura-ni gitcham MP Agatha K Sangma-ko lak 1.55-na batgipa vote-rangchi chee gital MP-na seokako man·ahachim aro Saleng-ni MLA ong·aoniko watangani ja·man da·o Gambegre Assembly constituency-na gital MLA-ko seoktaina nangengachim.
Da·o dipet Gambegre by-election-ni tarikko Election Commission parakatkujaengoba, ia by-election-ko jadokni gisepon ong·atna nangengachim.
