SHILLONG: Politics-o mamingan baikamgipa dongja aro 2028 Assembly poll-rangna skangan haida a·doko obostarang dingtangainaba donga ine Meghalaya Pradesh Congress Committee (MPCC)-ni padot, Vincent H Pala aganaha.
“MDC election-rangko ia bilsi ba mikkang bilsio ong·ataode ia election-ni somoion ma·siaigen, MLA election-rangde ru·utengkua, NPP uamangni gualanirangko nipilnaba donga, VPP gualanirangko daknaba donga, uni gimin da·omanchade jeko agansonaba agre seng·gnangdugaenga” ine da·omiting State politics-ni obostarangni bidingo agangrikao Pala ia kattarangko aganaha.
“Congress, pangnan apsan chanchianiko ja·rika, aro dolna on·kanggipa ong·a. Anga bang·ako aganna nangnikja, indiba ian election-ni somoio pangchaka, basakoba saoba maiba gualaniko dakode uamang ga·akgen aro saoba namako dakskaode ua tang·doanggen, aro uan manderangni chanchia gitade altua ong·ja,” ua agandapaha.
Da·omitingode VPP chubatao ong·enga, NPP aro UDP-de uamangni kosako adita kamrangni a·sel tang·onenga, unomitingo State TMC-de tangnan neng·ani ong·enga. Unomitingo re·anggipa Lok Sabha election-o Tura parliamentary seat-ko cheani ja·mano Congress-de namen de·chaoaniko man·aha.
Unomitingko knaritinggipa koborrangko man·ani gitade, party-oni ong·katanggiminrangko man·chape bang·arangan Congress-o napna am·giparang dongenga, je koborrangkon jangbingbangasan ine Congress dilgiparang aganskaengachim.
“Ian kakket ong·a ine anga chanchija. Ian janggipa kattarangsan ong·aia, indakarangni bidingo maming kobor dongja aro Dr Mukul Sangma-ba dongja,” Pala aganaha.
Indake ong·engon, Meghalaya-ko man·chape a·songni bang·a biaprangon Congress-ni tang·dobaenganiko nikna man·engaha ineba ua aganaha.
