TURA: Dadenggre jolrango manderangko salruragipa bus garirang chu·ongjaengani a·sel skulrangchi re·enggipa chatro chatrirang gari nokkingrangosa re·rurana nange kenchakna nanganirang ong·engani gimin Dadenggre jolrango poraienggipa chatro chatrirangna dingtangmancha bus garirangko on·dapchina gita A·chik Progressive Approach (APA) Rom Agalgre regional unit, sorkariko didiataha.
APA Rom Agalgre regional unit-ni president Sengkambal Ch Sangma-ni u·iatani gitade, Dadenggre jolrango manderangko salruragipa bus garirang chu·ongjae aro gario seat-rang chu·ongjae, chatro chatrirang nokkingrangosa re·rurana draatako man·enga aro ian chatro chatrirangna kenchakna nangani ong·skaenga.
“Ia jolrango bus garirang aro bus gario seat-rang chu·ongjae chatro chatrirang, nokkingrangosa gae skulrangchi re·na nangenga aro ian chatro chatrirangna kenna nangani ong·enga. Ian ia jolrango bus garirangni chu·onggijaniko mesokan baksana Meghalaya Transport department, skulko chalaigiparang aro bus nokgiparangni simsakna gisik nanggijaniko mesokaniba ong·enga,” ine Sangma parakataha.
Indake ong·engon, Dadenggre-o skul re·enggipa chatro chatrirangna bus garirangko on·dapchina, chatro chatrirangni namgnina garirango niamrangko rakbatate nirokchina aro bus garirango re·ruraenggipa manderangko gari nokgiparang aro garini driver-rang an·tangtangan simsak nirokchina gitaba APA Rom Agalgre regional unit dabiangaha.
Dadenggre-o chatro chatrirangna bus garirangko on·dapchina APA didia
Date:
Share post:
