SHILLONG: Meghalaya a·dokni SSA skulrango Non-Teaching staff ong·e kam ka·enggiparangna dormahako 80 percent-chi bariatchina, bilsini kri 2 percent-ko bariatchina aro bilsiprakon 5 percent ka·e bariatchina dabienba Budbar sal dipet, All Meghalaya SSA Non-Teaching Staffs Association (AMSSANTSA)-ni sak 600-mangni gita membor-rang, Shillong songjinmani Madan Malki kal·chakramo, indefinite ba ari gri asonge jingjengataniko a·bachengataha.
Ia Non-Teaching Staff-o SSA-ni office ning·o cluster level, block level, district level aro state level-o kam ka·enggiparangkoba man·chapachim.
Ia jingjengataniko ong·atani bidingo kobor ra·timgiparangna talate on·angengon, “Chinga apsan kamna apsan dormahako dabienga. Chinga chingni dormaharangko bariatan baksana kamo brebatgiparangna 2 percent-chi dormahako bariatchina aro bilsiprakon 5 percent ka·e dormahako bariatchina dabie, da·al dipet ari gri asonge jingjengataniko a·bachengataha,” ine AMSSANTSA-ni president Jennifer Synrem parakataha.
“2016 bilsionin SSA skulrango Non-Teaching staff ong·e kam ka·enggipa manderangni dormahako bariatchina dabiengoba da·alonan chingna maming ku·rachakaniko on·kujaengani gimin, chingni dormahako bariatna ku·rachakaniko on·kujaskal chinga da·aloni a·bachenge, ari gri asonge jingjengatna tik ka·aha,” ineba AMSSAANTSA-ni president aganaha.
AMSSAANTSA-ni parakatani gitade, SSA Non-Teaching staff-ni dormahako bariatna gita proposal-o nangchakegipa file-ko finance department-na watatmanaha ine Education Minister Rakkam Sangma an·tangan, 2023 bilsini Assembly session-o parakahachim indiba da·alonan iani bidingo maming ja·kurangko de·kujaengachim.
