TURA: Selsella Block-ni ning·o PWD ramaoni Haripur Jama Mosque-ona rikna on·gipa ‘embankment’ ba kapenganiko hisapgimin gita aro noksa salgimin gita rikjaha ine West Garo Hills a·jani Anti-Corruption Foundation of India (ACFI) matnangatenba, iani bidingo magisterial aro technical inquiry-ko dakchina West Garo Hills a·jani Deputy Commissioner-na sedoataha.
ACFI Meghalaya State unit-ni president Abdur Rup Chowdhary-ni parakatani gitade, PWD ramaoni Haripur Jama Mosque-ona chi bananiko champengna gita embankment-ko rikna gong lak 4 tangkarangko chame on·ahachim indiba ia kamko jako ra·gipa contractor, kamko estimate gita aro noksa salgimin gita rikgija tangka paisarangko jakkalsretskaahachim.
“Ia embankment-ko rikani bidingo chingni RTI ka·e man·ani gitade, PWD ramaoni Haripur Jama Mosque-ona embankment-ko rikna gita CMSRDF scheme 2022-23-ni ning·o Tarah Miah minggipa contractor-na gong 4,00,000 tangkarangko chamatahachim indiba da·alona kingkingan ia embankment-ko chamgimin koros gita aro noksa salgimin gita rikkuja,” ine ACFI-ni president parakataha.
Ia gong 4,00,000-ni cheque-ko kosako janapgimin contractor-na chamatahachim ine janapatengon, PWD ramaoni Haripur Jama Mosque-ona tarina on·gipa embankment-ko niam gita rikgija ia contractor, tangka paisarangko jakkalsretaha ine Chowdhary parakatenba, iani bidingo magisterial aro technical inquiry-ko dakchina West Garo Hills a·jani Deputy Commissioner-ko didiataha.
