SHILLONG: Meghalaya Public Service Commission (MPSC)-ni kamrangko nambate ka·na man·na gita Commission-ko gital dake songpiltaina nangenga ine Khasi Students Union (KSU) parakataha.
Bristibar salo, MPSC-ni chairman PR Marwein-ko grongeani ja·man kobor ra·timgipa manderang baksa agangrikengon, MPSC-ko qualify ong·gipa chairman aro membor-rangsa dilna nanga ine KSU-ni assistant general secretary Reuben A Najiar parakataha.
MPSC-ni chairman aro membor-rangko songna gita niamrang dongna nangani gimin Commission-ko politics-ni gita seokgipa manderangna dilna man·jawa ineba ua aganaha.
MPSC-ko politics-ni gita seokgimin manderangsa dilangkuaia ong·ode, mikkangchiba apsan daken ia dilgiparang, an·tangtangni dilgiparangni skani gitasa commission-ko chalaigen aro commission-o ong·gija dakanirangko nikna man·kuaigen ineba KSU-ni assistant general secretary aganaha.
“Commission-ko politics-ni gita seoka man·gipa manderangsa dilangkuaia ong·ode, uamang minister-rangni agananirangko manina nangaigen aro uamangni dilgiparangko jechakna man·jawa,” ine Najiar aganaha.
Ia changosa uamang commission-ni ong·gija dakaniko rim·na man·aha ine janapatengon, batanggimin changrangoba commission-ni ong·gija dakgipa kamrang bang·en dongachim indiba ia kamrangko darangba ma·sirikjaha ine KSU-ni dilgipa parakataha.
Najiar-ni parakatani gitade, statistical officer-ni kamna ge·gni biaprang donggenchimoba biap ge·sasan dongaia ine advertisement-o uamang sesretaha ine MPSC-ni chairman a·kangatahachim.
“Ian mingsa toe agananisan ong·aia. MPSC-ni kamko nirokenggipa manderangan qualify ong·chengja ong·ode mikkangchiba iandakgipa kamrangko nikna man·kuaigen,” ine KSU-ni assistant general secretary parakataha.
