TURA: A·chik Conscious Holistically Integrated Krima (ACHIK) dolni president Thomas M Marak-ko ra·galanina ACHIK dolni dingtang dingtang unit-rang, chong·motan Rajabala, Selsella, Tikrikilla, Dadeng, Babadam, Nongal, Baghmara aro Rongmil unit-rang suk ong·gijaniko paraka ine adita salrangna skang songbadrango parakataniko ACHIK dolni president aro general secretary jegalatenba, gitcham president-ko ra·galanio pilak unit-rangan Krima Council baksa bakrimaha ine talataniko on·ataha.
ACHIK dolni general secretary Happynews R Marak-ni parakatani gitade, gitcham president Thomas Marak-ko ra·galanio mitam unit-rangde Krima Council-ni kamna kusi ong·jaha ine parakataniara kakket ong·ja maina Krima Council-ni gitcham president-ko ra·galna tik ka·anio pilak unit-rangan apsan ku·mong nangrimani dongachim.
Gitcham president-ko ra·galanio dingtang dingtang unit-rangni bakrime seatgipa chittirangkoba ACHIK Krima Council, kobor setimgiparangna on·ataha.
“Uni gimin Krima Council-ko dingtang dingtang unit-rangni matnanganiara kakket ong·ja maina Raksamgre, Phulbari, Babadam, Rongmil, Dainadhubi, Resubelpara, Rajabala, Baghmara, Dadenggre, Nidanpur, Chibinang, Tikrikilla Women’s Wing aro pilak unit-rangan ACHIK Krima Council-ni ja·ku de·anio bakrimaniko on·aha,” ine ACHIK Krima Council-ni general secretary parakataha.
ACHIK dolni bimingo tol·e kobor on·enggipa manderangni kosako Krima Council rakgipa ja·kurangko de·na tik ka·aha ineba general secretary parakataha.
