TURA: Bangladesh a·songoni bang·en manderang sima gita Garo Hills-ona niam gri re·napbaaha ine Garoland State Movement Committee (GSMC) parakatenba, Bangladesh a·songo so·sojengjeng ong·anirang namanghaon, ia manderangko Bangladesh a·songona watpilatchina, Garo Hills-ni Commissioner of Division-na sedoataha.
GSMC-ni Commissioner of Division-na sedoatani gitade, Bangladesh a·songoni sak 280-mangni gita manderang, niam gri a·song damgnini simarang gita Garo Hills-ona napsrukbaaha aro ian Garo Hills-ni manderangna kenchakna nangani ong·enga.
Ia manderang Garo Hills-ni badia badia biaprango dongenga, uarangko am·sandichina gita didiatengon, gipin a·songrangoni manderang, iandake niam gri Meghalaya a·dokona aro mongsongbate Garo Hills-ona re·napbana man·jana gita pilak simarangon nanga gita check post-rangko donchina GSMC dabiangaha.
“Bangladesh a·songoni niam gri napsrukbae songdong a·chaenganichi Garo Hills-ni manderangna kenchakna nangani ong·enga maina ia manderang, Garo Hills-o songdongkamna jotton ka·gen. Uni gimin obostarangko ma·sichakenba nanga gita ja·kurangko de·china aro Bangladesh-oni niam gri napsrukbagipa manderangko so·sojengjeng ong·anirang namangahaon, a·songtangona watpilatchina chinga didienga,” ine GSMC parakataha.
