TURA: Home (Police) department-ni ning·o MPS officer-ni kamrangna interview-ni result-rangko parakanio niamko ja·rikjaha ine Garo Reservation Policy Coordination Committee (GRPCC) matnangatenba, ia interview-ni result-rangko den·galpilenba gital dake result-rangko paraktaichina Meghalaya Public Service Commission (MPSC)-ni Chairman-na sedoataha.
Iani bidingo MPSC-ni Chairman-na sedoatengon, MPS officer-ni kamna personal interview ra·anio candidate-rangko seokaniara 2019 bilsini August 2 tariko, MPSC-ni on·gimin advertisement-ni niamrang gita ong·jaha ine GRPCC-ni parakataha.
“MPSC-ni advertisement-o on·gimin niam gitade, personal interview-na okamako man·gipa candidate-rangni cut off ratio-ra, advertise ka·gimin kamrango pangchake 1:10-oni 1:2.5-onasa ong·na nangachim. Uni gimin komibatgipa ratio-na 1:2.5-ko ra·genchimoba personal interview-na okamako man·gipa candidate-rangara ge 17 kamna sak 42.5 ba 43 ong·na nangachim indiba personal interview-na sak 27 candidate-rangkosan okamskaaiaha,” ine GRPCC parakataha.
“Maini gimin advertisement-o on·gimin niamrangoni dingtangate, personal interview-na candidate-rangko komibate okamaha? Ian choljoktelgijani ba ong·na amtelgijani a·selsa ong·genchimode maini gimin Mains exam-na skang iako jinmana ba candidate-rangna u·iatchengna man·jaha? Ine GRPCC sing·doataha.
MPS officer-ni kamna seokaniko 2019 bilsionin a·bachengatahaoba da·ona kingking matchotkujaenga ineba GRPCC suk ong·gijaniko parakataha.
