SHILLONG: Meghalaya a·dokoba Bangladesh a·song gitan jinma chakatna nangenga ine Voice of the People’s Party (VPP)-ni president Ardent Miller Basaiawmoit-ni aganani ja·man politics ‘kal·engon’ dongimin arina batna nangja aro kraa gitasa aganna nanga ine National People’s Party (NPP)-ni dilgipa aro a·dokni Cabinet Minister Rakkam A Sangma parakataha.
Bangladesh a·songo ong·enggipa obosta gita a·gilsakni darang biaprangon ong·jachina ine an·tangni skaniko parakatengon, politics ‘kal·engon’ ari dongna nanga aro iandakgipa politics kal·anirang arina batna nangja ine Sangma aganaha.
Ardent Basaiawmoit-ni agangipa kattarangni bidingo mamingkoba agandapna jechakangengon, political dolrangni miksongani aro bebera·aniaranga manderangna didiani aro ka·donganikosa on·na nanga ine Sangma aganaha.
Bangladesh a·songo ong·enggipa obostachi bang·a manderangan janggirangko gimaatna nangaha aro Prime Minister an·tangan a·songtangko wate katna nangahani gimin iandakgipa obostarangko darangba toe aganna nangja ineba ua aganaha.
“An·ching uandakgipa gadangonan re·angna nangja,” ine Rakkam aganaha.
