SHILLONG: Group B, C aro D gadangni kamrangna ra·anio personal interview ra·aniko bon·atchina gita dabianiko sorkari knachakjaengani gimin jegale, Khun Hynniewtrep National Awakening Movement (KHNAM) dolni membor-rang da·al Sombar saloni a·bachenge, Shillong songjinmani Malki robol kal·chakramo asonge jingjengatna tik ka·angaha.
Iani bidingo kobor ra·timgiparangna u·iatengon, Group B, C aro D gadangni kamrangna manderangko ra·anio, personal interview ra·aniko bon·atchina gita uamang bilsisa skangonin dabiengahachim indiba da·alonan ia dabianiko sorkari chu·sokatchipkujaengani gimin jegalaniko mesokna gita Sombar sal dipet asonge jingjengatna tik ka·aha ine KHNAM-ni working president Thomas Passah parakataha.
Sorkarini dingtang dingtang department-rango bangbang ong·e dongenggipa kamrangko gapatanio, kamrangko man·na kragipa candidate-rang man·china gita personal interview-ko ra·gija written examination ba porikka seaniosa pangchakna nanga ineba ua aganaha.
Ma·mong sorkari aro gipin a·dokrangoba iandakgipa gadangni kamrangna personal interview-rangko bon·atahani gimin uamang MDA 1.0 sorkarinaba sedoatmanahachim ineba KHNAM-ni working president parakataha.
“Ma·mong sorkari, Group B, C aro D gadangni kamrangna personal interview ra·aniko 2016 bilsion bon·ataha aro a·songni gipin dam 23 a·dokrangba ia apsan niamkon ra·gataha,” ine ua aganaha.
Kamrangna manderangko ra·anio dongnuani gri ong·na gitasa iandakgipa niamko ma·mong sorkari ra·gataha aro Meghalaya sorkariba ia apsan niamko ja·rikna nanga ineba ua aganaha.
Ia dabianiko sorkari knachakkujaskal, Sombar saloni a·bachenge uamang Malki robol kal·chakramo asonge jingjengatanggen ineba KHNAM-ni working president parakataha.
