SHILLONG: Meghalaya Democratic Alliance (MDA) sorkarini kosako matnangrongengani gimin je dolrangan sorkariko chalaiengachim, da·o dipet uamangko chalaina on·aichina aro an·tangtangna dongimin somoiko sengchina gita Budbar salo National People’s Party (NPP), Voice of the People’s Party (VPP)-ni dilgiparangko didiataha.
“Sakkirangko mesokna man·kujaskalde matnanganiranga matnanganisan ong·aigen aro maming nangchakeani dongjawa. Da·o dipetde na·simangna somoi ong·kujani gimin jean sorkariko chalaienga, uamangkon chalaina on·aibo. Na·simangnaba somoi sokbaaigen,” ine a·dokni Cabinet Minister aro NPP-na ku·wattimgipa Ampareen Lyngdoh aganaha.
NPP-chi dilenggipa MDA sorkarini kosako VPP-ni dingtang dingtang dake matnangrongengani gimin Lyngdoh, ia kattarangko aganaha.
Meghalaya a·doko tangka paisarangko jakkalsretenga aro sorkariko ong·gija dake chalaienga ine VPP, MDA sorkarini kosako matnange aganrongachim.
Sorkarini kamrangko manderangsa tosusagen ine janapatengon, “MP election-ni ja·man bang·en dingtanganiko nikna a·bachengengaha, uni gimin uamangni (VPP)-ni matnanganiranga mamingba ong·ja. Meghalaya a·dokni manderang politics-ni gita namen matsramgiparang ong·a aro a·dokko man·chengaonin sakkirangko mesokgimin ong·a,” ine Lyngdoh aganaha.
Sakgipinko matnangnade namen altubea ine janapatskaengon, sakgipinko matnangana bate manderangni nangan somoio kamrangko chu·sokatani aro an·tangtangni skiprakaniko ja·rikanian mongsongbatgipa ong·a ine NPP-ni dilgipa aganaha.
