SHILLONG: Congress dolni MLA sakgittam NPP-o napangani ja·man da·o Congress dolo MLA saksasan dongaiahaoba Opposition dolni dilgipako dingtangatani bidingo da·o dipet Assembly Speaker-oni maming u·iatanirang dongkujaenga.
Koborko on·ani gitade, Leader of Opposition (LO) ba Opposition dolni dilgipa ong·na gita da·o Trinamool Congress (TMC)-na cholrang nambatengahani gimin ia kamko a·dokni gitcham Chief Minister aro TMC-ni dilgipa Dr Mukul Sangma ong·jaode TMC-ni state president Charles Pyngrope man·ani cholrang dongenga.
Da·o dipet LO-ni kamko Congress dolni saksakamkam MLA Ronnie V Lyngdoh-an jako ra·kuengachim.
Niam gitade, Opposition dolni dilgipa ong·na gita party-o Assembly-ni bak chikkingoni baksa ong·na gita nangachim aro uan komibeoba sakdok membor-rang dongna gita nanga ong·jaode Assembly-ni Speaker, dal·batgipa opposition dolna on·na bil dongskaachim.
2023 bilsini Assembly election-ni ja·man Congress aro TMC dolgnion MLA sakbonga ka·e dongachim aro VPP-o MLA sakbri dongskaachim. Membor-rang chu·ongjagenchimode LO-ni kamko Assembly-o ja·delbatsranggipa membor-na on·rongaiachim aro iako hisapgenchimode ia kamko TMC-ni dilgipa Dr Mukul Sangma-an man·ani ong·achim.
Indake ong·genchimoba ua somoio, Congress dolni dilgipa Ronnie V Lyngdoh-nasa LO-ni kamko on·skaahachim.
Da·o Congress dolo MLA saksasan dongaiahani gimin Opposition-ko dilgipaba dingtang ong·skana nangengaha.
MLA sakgittam NPP-o napangahaon ua LO-ni kamko watgen ine iana skang, da·o Opposition dolko dilenggipa aro Congress dolni dilgipa Ronnie V Lyngdoh-ba aganahachim.
“Anga an·tangan LO-ni kamko watna nanggenma ma Speaker an·tangan angna u·iataniko on·genma uko sing·sandina gita anga Assembly Speaker-ko gronggen. Da·o Congress dolo anga saksansa MLA ong·aiahani gimin LO-ni kamko angni jako ra·e donganiara kraani ong·jaenga,” ine Lyngdoh aganaha.
