SHILLONG: Congress dolni MLA sakgittamko National People’s Party (NPP)-o napatna man·ahaoba Opposition dolni dilgipa aro Congress dolni saksakamkam MLA Ronnie V Lyngdoh-de NPP-o napna gita jechakskaaha.
Iani bidingo sing·anina aganchakaniko on·angengon, ua maiba nambata cholrangko sengenggipa mande ong·genchimode Congress dolni gipin sakgittam MLA-rang baksaan NPP-o napangaignokchim ine Lyngdoh aganaha.
“Anga da·oba Congress dolon ong·enga aro pangnan ong·angaigen,” ine ua aganaha.
Meghalaya Legislative Assembly-ni sak 60 donggipa membor-rangni gisepo da·o Lyngdoh-mangmangsan Congress dolni MLA ong·aiahachim ine nikna man·a.
Manderangni seoke watatgipa dilgiparangchisan party-ko chalaia ong·ja indiba manderangna nambate dangdike on·na gita Congress dolo bang·en niamrang aro miksonganirang donga ineba ua aganaha.
National party-o donge manderangna nambate dangdike on·na man·a ine janapatengon, BJP-ni miksonganiara a·songko bak dakani aro jat baseanisa ong·ani gimin manderangna nambatgipa cholde Congress dolmangmangsan ong·aia ine Lyngdoh aganaha.
Darangnaba niteani gri aro miknengani gri dangdike on·na gita seoka man·gimin dilgiparangni ku·mikchetanirangko janapatskaengon, a·songko bak dakani aro jat baseani politics-ko kal·gipa dingtang dingtang dolrang aro dilgiparang donga ine Congress dolni saksakamkam MLA Lyngdoh parakataha.
