TURA: Garo Hills Autonomous District Council (GHADC)-o kam ka·enggipa manderangni man·na nangkuenggipa dormaharang da·o ja 34 batangpilengahani gimin ia dormaharangko ta·raken on·china A·chik Conscious Holistically Integrated Krima (ACHIK) dabiangaha.
Iani bidingo GHADC-ni Chief Executive Membor Albinush R Marak-na sedoatengon, GHADC-o kam ka·enggipa manderang, an·tangtangni man·na nangkuenggipa dormaharangko man·kujaengani a·sel dingtang dingtang neng·nikanirangko chagrongna nangtokengaha ine ACHIK parakatenba, GHADC-o kam ka·enggipa manderang aro uamangni nokdangrangni namgnina ia dormaharangko ta·raken on·china didiataha.
“GHADC-o kam ka·enggipa manderang, an·tangtangni man·na nangkuenggipa dormaharangko man·tokkujaengani a·sel nokdang chalaianio, mongsongbate cha·ani ringanirang, dedrangni skul fee-rang, sanna bananirang aro uandakgipa dingtang dingtang kamrangna koros dongjae neng·nikanirangko chagrongna nangtokenga. Iani bidingo GHADC-o kam ka·enggipa manderangoni bang·an chingonaba an·tangtangni dukrangko u·iataha. Uni gimin kam ka·enggipa manderangni man·na nangkuenggipa dormaharangko ta·raken on·china chinga nang·ko mol·molenga,” ine ACHIK Krima Council-ni dilgiparang, GHADC-ni CEM-na sedoatgipa chittio janapataha.
GHADC-o kam ka·enggiparangna somoi gita dormaharangko on·na man·na gita GHADC-o Salary Reserve Fund-o ra·gatchina, GHADC-o koros ong·anirangko nirokjringchina aro sandijringchina, kam ka·enggiparangna maming dongnuani gri tangka paisani bidingo u·iatjringchina aro somoi gita kam ka·enggiparang baksa agangrikjringchina gitaba ACHIK, GHADC-ni CEM-ko didiataha.
GHADC-o kam ka·enggiparangni bangki dormaharangko on·china ACHIK dabia
Date:
Share post:
