NPP-ni chang 12-gipa Foundation Day-ko manianga
SHILLONG: Lok Sabha-ni gitcham Speaker Purno A Sangma sagini chang 77-gipa atchiani salko maniani bak gita Sombar salo, National People’s Party (NPP)-ni chang 12-gipa Foundation Day-ko Sombar salo, Shillong songjinmao maniangaha aro ia salko mania a·dokni Chief Minister aro NPP-ni national president Conrad K Sangma, jinmana aganprakengon, ua an·tangde songsalko bak ka·na jotton ka·gipa politics-o bebera·ja indiba manderangko nangrimataniosa bebera·a ine aganaha.
NPP-de gipin dolrang gita ong·gija, nama chanchiani baksasa kamrangko ka·gipa dol ong·a ine janapatengon, ua an·tangba songsalko bak ka·na jotton ka·gipa politics-kode bebera·gipa ong·ja ine Sangma parakataha.
“Angbaksa kam ka·rimgipa je mandekoba na·simang sing·e nina man·aigen indiba anga an·tangde bak dakgipa politics-kode chakna man·ja. Je tom·anioba chinga pangnan gimikni namgninasa chanchie ja·kurangko de·ronga,” ine Chief Minister aganaha.
NPP-ni dilgiparangko aro pilak membor-rangkon pangnan bamgipa ong·china aro an·tangtangni gadang aro bilrangko ong·gija dake mesokjachina gitaba ua didiangaha.
“Na·simangni dangdike on·enggipa manderangna pangnan namako dakbo aro bamgipa ong·rongbo. A·dokni manderangna, mongsongbate kangal cholgrirangna maming saloba an·tangtangni bil aro gadangko mesokna nangja. Na·simangni salam ka·ani aro ramram ka·dingsmitanichin mande saksani neng·nikanirangko 50 percent-kode komiatna man·gen,” ine Sangma aganaha.
Ia tom·anio, a·dokni Deputy Chief Minister aro NPP-ni state president Prestone Tynsong-ba jinmana aganprakangengon, Gambegre by-election-ko uamang chegipa ong·telgen ine an·tangni ka·dongchakaniko parakangaha. NPP-oni bang·a dilgiparangan ong·kate katna miksongenga ine agananirangkoba ua jegalataha.
“Manderang jekoba agane roaichina indiba chinga NPP dolni gita 2028 bilsini Assembly election-o chu·sokgipa ong·genchimode batanggimin bilsirango gitan mikkangchiba bilakroroangkuaigen,” ine Tynsong aganaha.
 |
ReplyForward
|
