TURA: East Garo Hills a·jani Dobu Primary Health Centre (PHC)-ni ning·o donggipa Bolmoram sub-centre ba Health & Wellness Centre-o kam ka·giparang chu·ongjaengani a·sel saenggipa manderangko sanna bananirango neng·nikanirangko chagrongna nangenga ine East Garo Hills a·jani A·chik Organisation for Social Welfare (AOSW) parakataha.
Iani bidingo Williamnagar-ni District Medical & Health Officer (DMHO)-na badi ka·e sedoatengon, Bolmoram Health & Wellness Centre-o kam ka·giparang chu·ongjaengani a·sel saenggipa manderangko sanna bananirango neng·nikanirangko chagrongna nangenga ine AOSW-ni general secretary Premier N Sangma parakatenba, ia health centre-na chu·onga gita kam ka·giparangko watatchina mol·molataha.
“Ia Bolmoram Health & Wellness Centre-ni ning·o bang·bea songrangkon man·chapengani gimin bang·a manderangnan sanna bananirangko on·na nangenga indiba ia centre-o da·onan ANM ba nurse-rang dongjani a·sel, sanna bananirangko ra·na re·baenggipa manderang re·angpilna gita nangtokrongaienga,” ine AOSW-ni general secretary parakataha.
Ia jolrango donggipa bang·a songrangon an·pakna sie dongenggipa me·chikrang bang·en dongani gimin Bolmoram Health & Wellness Centre-ko ta·raken namdapatna nangenga ineba AOSW parakataha.
“Ia jolrango donggipa songni manderang, bang·batan cholgrigiparangsa ong·e sanna bananirangko ra·na gita Williamnagar aro uandakgipa gipin biaprangona re·angna chol ong·paja, uni gimin ia manderangni namgnina ia Bolmoram Health & Wellness Centre-o chu·onga gita kam ka·giparangko donatna nangchongmotenga,” ine AOSW-ni general secretary, East Garo Hills a·jani DM&HO-na sedoatgipa chittio janapataha.
