SHILLONG: Indian Constitution-ni Sixth Schedule-ko taridapna sienggipa Constitution (125th Amendment) Bill 2019-ko ma·mong sorkari, re·baenggipa November jao ong·atna sienggipa Parliament-ni Winter Session-ona ra·banaba gnang ine Khasi Hills Autonomous District Council (KHADC)-ni Chief Executive Membor (CEM) Pyniaid Sing Syiem parakataha.
Sixth Schedule-ni adita niamrangko taridapna miksongengani gimin salgro salaram a·dokrango donggipa dam 10 autonomous district council (ADC)-rang, an·tangtangni chanchiani aro ku·pattianirangko, Home Affairs-ni Minister of State Nityanand Rai-chi dilenggipa committee-na on·atmanaha ineba Syiem parakataha.
KHADC CEM-ni parakatani gitade, Sixth Schedule-ni ning·o ADC-rangna tangka paisani gita, executive-ni gita aro administrative-ni gita bilrangko on·dapna miksongenggipa bill, bon·chipengahani gimin ia Bill-ko pass ka·anio chagrongna nangenggipa neng·nikanirangko committee, namatna jotton ka·gen.
“Iani bidingo agangriktaina gita chinga bakan New Delhi-ona re·anggen,” ine Syiem aganaha.
