TURA: Tikrikilla-oni ong·gijagipa candidate saksa Open Category-o 2024-25 bilsini MBBS, BDS, BHMS aro BAMS, BUMS aro BASLP-ba a·dok sorkarini quota-o seokako man·aha ine Raksamgre jolni dingtang dingtang dolrang, jekai Garoland State Movement Committee (GSMC) Pedaldoba Regional Unit, A chik Indigenous Justice Initiative Forum(AIJIF) Tikrikilla Regional Unit, Garoland State Movement Committee (GSMC) Raksamgre Regional Unit aro Federation of A·chik Freedom (FAF) Pedaldoba Regional Unit parakatenba, ia candidate-ni bidingo name sandiroktaienba, sorkarini quota-ko ra·pilchina West Garo Hills a·jani Deputy Commissioner-ko didiataha.
Deputy Commissioner-na badi ka·e sedoatgipa chittio NGO-rangni parakatani gitade, Shashi Bushan Singh minggipa mandeni depante Saksam Singh-ara Meghalaya a·doko songdongkamgipa aro a·doko poraigipa chatroba ong·jachim maina uni atchugipa Jaleswar Prasad Singh, bilsi 20-na skang Meghalaya a·dokko wate re·angaonin uni nokdangoni darangba Tikrikilla-o songdongegipa dongjahachim.
Ia candidate-na re·anggipa July 19 tariko Raksamgre Civil Sub-Division-ni Additional Deputy Commissioner (ADC) name sandichenggija ma·sisretesa Permanent Resident Certificate (PRC)-ko on·aha ine janapatengon, PRC-ko man·na gitade komibeoba Meghalaya a·doko bilsi 12 songdonggipa ong·na nangachim ine NGO-rang parakataha.
“Ia candidate-ni pagipana a·a pattako GHADC, 2016 bilsiosa on·ahani gimin da·o bilsichetsan gapkuengpiti aro uamangni songdongani bilsi 12 gapkujani gimin PRC-ko man·ani ong·kujachim. Ia mande, una skangba a·doko songdonggipa ong·ja, poraigipaba ong·ja indiba ua Meghalaya a·doko songdongkamgipa me·chikkon biade ka·ahakon,” ine Raksamgre-ni NGO-rang parakatenba, ia candidate-ni kosako ta·raken am·sandienba nanga gita ja·kurangko de·china Deputy Commissioner-ko didiataha.
