SHILLONG: Meghalaya a·doko lekka porako namdapatna gita chol ong·gipa biaprangode smart classroom-rangko kuligen aro pilak skulrango technology-ko namdapatna jotton ka·enga ine a·dokni Education Minister Rakkam A Sangma parakataha.
“Digital education aro smart classroom-rangko kulina sienga aro man·a dipet smart classroom-rangko kulina sorkari jotton ka·enga,” ine Sangma aganaha.
Education Minister-ni aganani gitade, ia chasongara technology-ni chasongsa ong·ani gimin lekka porako on·anioba technology-ko jakkalna nangengaha.
“NCERT-ni textbook-rangko internet gita man·engaha aro an·chingo internet-rang donga ong·ode ia textbook-rangko pilakan man·aigen,” ine ua aganaha.
Da·o dipet a·doko ia cholko chu·gimik jakkalkujaengoba mikkangchi ian dingtang ong·gnok ineba Education Minister ku·rachakaniko on·angaha.
Re·baenggipa bilsioni Science aro Mathematics gita dakgipa subject-rangna QR code-rangko a·bachengatna miksongenga ineba ua aganaha.
“Pilak katta bichongrangon chu·gimik talatanirang donggen aro board porikkani question-rangkoba textbook-rangon talate on·gen,” ine Sangma aganaha.
A·doko, mongsongbate songadam nokadamrango network-rangko man·jaengani gimin janapatengon, iandakgipa biaprango mobile aro internet service-rangko name man·kujaenga ine Sangma ku·chakaha.
“A·doko 80 percent-ni gita biaprango internet-rangko man·ahaoba 10 ba 20 percent-ni gitade name man·tokkujaenga. Ia pilak neng·nikanirangkon an·chingni Chief Minister ma·sia aro bakan a·dokni pilak kona noksikrangonan mobile network-rang sokanggnok,” ine ua aganaha.
Ia pilak songrangon internet service-rangko man·ahaode manderang internet gita lekka porani pilak ki·taprangkon man·gnok ine Education Minister parakataha
