SHILLONG: Shillong songjinmani Harijan Colony ba Them Metor-o songdongenggipa manderangko dingtang biapona apjitatskana sorkari miksongengon, ia biapo donggipa mite nokko pe·e galna jotton ka·ani a·selsa da·o dolgnini gisepo meligrikna man·kujaenga ine Harijan Panchayat Committee, a·dok sorkariko matnangatskaaha.
Iani bidingo talataniko on·angengon, Harijan Colony-o songdongenggipa manderangko dingtang biapona apjitna manchianiko HPC ra·chakengahachim indiba da·o ia biapo donggipa Gurudwara aro mite nokko sorkari pe·e galna miksonganirang dongani giminsa uamang iako jegalenga ine HPC-ni secretary Gurjeet Singh parakataha.
“Sorkarini nangnikani gitan chinga dingtang biapona apjitna gita kusi ong·engachim indiba dolgnini agangrikani bon·angachibara sorkari, chingni olakkiram nokrangko pe·e galna ra·baaha. Ian chingni gisepo neng·nikanirangko sorkarini namatna gisik nangjaenganiko mesokanisa ong·aha,” ine Singh aganaha.
Olakkiram nokrangko pe·e galanikode uamang ra·chakna man·teljawa ine janapatengon, Harijan Colony-ni sambaon ia gittimo songdongenggipa manderangna a·ako on·skana gita sorkari, Defence official-rang baksa agangrikenga ine HPC-ni secretary parakataha.
2018 bilsio Harijan Colony-o dinggrikanirang ong·katani ja·man sorkari, iani bidingo dingtangmancha High Level Committee-ko songe donangahachim aro untalan ia biapo songdongenggipa manderangko dingtang biapona apjitna manchiani kamrang matchotkujaengachim.