SHILLONG: Sakgittam Congress MLA-rangni ong·kate katanichi Gambegre by-election-o Congress dolna maming nangchakeani dongjawa ine Meghalaya Pradesh Congress Committee (MPCC)-ni working president Pynshngain N Syiem parakataha.
Syiem-ni kobor ra·timgiparangna parakatani gitade, Tura Lok Sabha seat-ko Saleng A Sangma-ni cheani ja·man Gambegre Assembly seat-ko chepiltaina gita Congress dol, rakbee kamrangko ka·engahachim.
“Tura Lok Sabha seat-ko Congress cheani ja·man Congress dolna kam ka·enggipa manderang, mongsongbate Deborah Marak, Gambegre by-election-na rakbee kamrangko ka·sona a·bachengaha,” ine Syiem aganaha.
MLA-rang ong·katani ja·man party-na nangchakeanide dongrongaia ine janapatskaengon, ia changode manderang Congress dolo ka·dongpiltaina a·bachengahani gimin obostarang namen dingtanggnok ine MPCC-ni working president parakataha.
Congress dolni MLA sakgittam, chong·motan Umsning-ni MLA Dr Celestine Lyngdoh, Mawhati-ni MLA Charles Marngar aro Nongstoin-ni MLA Gabriel Wahlang, adita salrangna skang party-oni ong·kate NPP-o napangskaahachim aro uandaken da·o Congress dolo Ronnie V Lyngdoh saksakamkam MLA-san dongaiahachim.
MLA sakgittamni ong·kate gipin dolo napanganichi da·o Gambegre by-election-na skang Congress dolko bilgriata gita ong·aha ine adita salrangna skangsan Congress doloni mitam kobor on·timgiparang parakatahachim.
Gambegre constituency-ni gitcham MLA aro Congress dolni dilgipa Saleng A Sangma, Tura Lok Sabha constituency-ni MP-na seokako man·e MLA ong·aniko watna nangahani a·sel Gambegre by-election-ko ong·atna nangengahachim.
Lok Sabha election-o Congress dolni Saleng Sangma cheenba Tura-ni MP-na seokako man·ani ja·man, Meghalaya a·doko Congress dolko bilakatpiltaina miksongengachim indiba ia sakgittam MLA-rangni ong·katani ja·man Congress dol bilgribatatako man·skaaha ine kobor on·timgiparang aganahachim.