SHILLONG: November 20 tarikoni November 28 tarikona Goa-o ong·atna sienggipa International Film Festival of India (IFFI)-o, Elvachisa Ch Sangma aro Dipankar Das-ni tarigipa ‘Chanchisoa’ Garo jawilwatkoba mesokna gita seokaha.
Ia Garo jawilwatba, ia chang 55-gipa IFFI-o mesokna gita India a·song gimikoniko seokgipa ming 20 non-feature film-rangoni seokako man·pagipa mingsa jawilwat ong·pae Meghalaya a·dokna aro A·chikrangna mikkim rasongko ra·baaha.
Ia bilsini IFFI-o India a·songni salgro salaram jolrangoniko ia Garo jawilwat baksana Arunachal Pradesh a·dokni Galo jawilwat ‘Karken’-koba mesokna seokaha. Ia Galo jawilwatko Nending Loder tariaha. Una agreba minggittam Assamese jawilwat, chong·motan Juiphool, Rador Pakhi aro Swargarath jawilwatrangkoba ia bilsini IFFI-o mesokna gita seokaha.
Ia chang 55-gipa IFFI-ko Information & Broadcasting Ministry-ni ning·o donggipa National Film Development Corporation aro Goa sorkari nangrime ong·atenga.
