SHILLONG: Meghalaya a·doko dingtang dingtang gadangni skigiparang, an·tangtangni dabianirangko knachakjaon, sorokrangona re·ange jingjengatanirangko dakrongengoba skigiparangni iandake jingjengataniranga Meghalaya a·dokosan ong·ja indiba a·songni pilak biaprangon ong·aia ine a·dokni Education Minister Rakkam A Sangma a·kangatskaaha.
Skigiparangni jingjengatanirangna bang·a manderangan aro dingtang dingtang dolrangba, a·dok sorkariko matnangrongachim ine nikna man·a.
Iani bidingo aganchakaniko on·angengon, “Skigiparangni sorokrango jingjengataniara namen dukni katta ong·a maina uamang an·tangtangni nanganirangna dabiesa jingjengattokenga. Indiba skigiparangni iandake jingjengatanirangko a·songni pilak biaprangon nikna man·a,” ine Sangma aganaha.
Sangma-ni aganani gitade, pilakan an·tangtangna chu·onge nanganirangko am·engoba sorkari, uamangna nangchongmotakosan chu·sokate on·na man·aiachim.
“Pilak sorkarirangan iandakgipa apsan neng·nikanirangko aro ra·bianirangko chagrongna nangronga. Skigiparangni chu·gimik dabianirangko chu·sokatanide altua kam ong·ja,” ine Education Minister aganaha.
Meghalaya a·dokni Samagra Shiksha Abhiyan (SSA) skulrango skigiparang, an·tangtangni kamko regularize ka·china aro dormaharangko bariatchina dabie baditaba salrangna jingjengatanirangko dakangani ja·man da·o gipin gadangni skigiparangba, dingtang dingtang dabianirangko dake jingjengatna a·bachengskaahachim.
Meghalaya a·dokni adhoc skulrango skigiparang deficit-ni gadangna dabitokengon, deficit skigiparangba provincialization-na dabitokskaengachim.
Skigiparangni iandake dabianirangko chu·sokate on·na man·jaengani gimin a·doko opposition dol ong·enggipa Voice of the People’s Party (VPP), NPP-chi dilenggipa MDA sorkariko matnangatahachim.
