TURA: Dadenggre Civil Sub-Division-ni ning·o donggipa Dichinggre songo, Jal Jeevan Mission (JJM)-ni kamrangko matchotja ine matnangatenba, iani bidingo inquiry-ko dakchina gita PHE Department Tura Division-ni Additional Chief Engineer-na sedoataha.
ACHIK-ni parakatani gitade, ia songo JJM-ni kamrangko matchotaha ine report-ko on·ahaoba songona re·ange nigenchimode, bang·bata kamrangan matchotgija dongakosa nikna man·enga aro iani a·selan songni manderang chiko man·jae neng·nikanirangko chagrongna nangtokenga.
“Songni manderangna ma·mong sorkarini ku·rachakani chirangko on·anio iandake kamrangko matchotgija donaniara namen kragijani ong·a aro songni manderangko cha·bokna jotton ka·ani ong·a,” ine ACHIK dolni dilgiparang parakataha.
Dichinggre songo songdongenggipa manderangni namgnina ta·raken iani bidingo inquiry-ko dakenba, ia kamko jako ra·e ka·gipa contractor aro official-rangni kosako nanga gita ja·kurangko de·chinaba ACHIK didiataha.
Meghalaya a·doko JJM-ni kamrang chu·sokenga ine batanggimin somoirango baditaba chang boksisrangkoba on·pilahachim ine nikna man·a.
Indake ong·genchimoba, Garo Hills-ni bang·a songrangon JJM-ni kamrangko matchotgija donengani gimin dingtang dingtang dolrangni aro songo noko donggipa manderangni badi ka·anirangko nikna man·skarongengachim.
