TURA: East Garo Hills a·jani Williamnagar-o donggipa Girls’ Nursing Hostel ba me·chikrangni nursing hostel-o boundary wall ba simako kapenggipa pakmarang dongjae, ia hostel-o dongenggipa me·chikrangna kenchakna nangani ong·enga ine Garo Hills Youth Solidarity (GHYS) parakatenba, ia hostel-na ta·raken boundary wall-ko rikchina dabiangaha.
Iani bidingo GHYS-ni dilgiparang, East Garo Hills a·jani District Medical & Health Officer (DM&HO)-ko grongenba, ia hostel-na boundary wall-ko ta·raken rike on·china didiangaha.
GHYS-ni general secretary Eric Bunty Marak-ni parakatani gitade, ia hostel-ni wilwilao buringrara dakani gimin ia hostel-ko kadulgipa pakmarang dongjae, ian hostel-o dongenggipa me·chikrangna kenchakna nangani ong·engachim.
“Ia sal somoirango pilak biaprangon me·chikrangna kenchakna ong·ani maina me·chikrangni kosako ong·gija dakanirang batroroengako an·ching pilakan nikna man·enga. Ia hostel-o me·chikrang, maming chel·chakani gri ong·e kenchakna nanganirang ong·enga, uni gimin ia hostel-ni wilwilao boundary wall-ko rikna nangchongmota,” ine GHYS-ni dilgiparang parakataha.
Ia hostel-ni boundary wall-ko rike on·an baksana me·chikrangni naljokgnina CCTV camera-rangko donchina aro security guard-rangko rakkichina gitaba GHYS dabiangaha.
