TURA: 100 Drums Wangala maniani dongani gimin adita salrangna dontongatani ja·man North Eastern Hill University (NEHU) Tura campus-ni chatro chatrirang, dingtang dingtang dolrangni bakrimanichi, campus-na Pro Vice Chancellor (PVC)-ko dabie aro Post Graduate Students Union (PGSU)-ko songpiltaichina dabie, Sombar salo jingjengatna a·bachengpiltaiaha.
Shillong-o NEHU-ni Vice Chancellor (VC) Prof Prabha Shankar Shukla-ko kam watchina aro registrar baksana deputy registrar-ko ra·galchina gita NEHU Students Union (NEHUSU)-ba dabie jingjengatanirangko dakengon, NEHUSU-ni dabianirangoba NEHU Tura campus-ni chatro chatrirang bakrimpaaniko on·angaha.
Chatro chatrirangni jingjengatanio, GSU aro GSMC dolrangba bak ra·angtokaha aro uamangni dabianirang chu·sokkujaskal, uamang baksa bakrimangkuna ku·rachakaniko on·angaha.
Chatro chatrirang, NEHU Tura campus-ni main gate-ko ketchangenba, ia gate mikkango jinma asonge jingjengataniko dakangaha.
“Shillong-o NEHU-ni VC-ko kam watchina aro university-o niam gri rakkigipa registrar aro gipinrangko ra·galchina NEHUSU-ni dabianio chingaba chakpaaniko on·enga aro Tura campus-na PVC-ko songe on·an baksana PGSU-ko songpiltaichina chinga dabie da·alo chingni jingjengataniko a·bachengtaiaha,” ine NEHU Tura Campus-ni Ph.D chatro Amsrang Momin parakataha.
NEHU Tura campus-o bangbang ong·e dongenggipa kamrangko gapatna nangchongmotenga ine dabiangskaengon, Tura campus-o bus garirang chu·ongjani a·sel, campus ning·o cholrang dongjani a·sel, campus-o ringani chirangko chu·onga gita man·jaengani a·sel aro uandakgipa dingtang dingtang a·selrangchi poraienggipa chatro chatrirang neng·nikanirangko chagrongna nangtokenga ine Amsrang parakataha.
