TURA: Garo Hills-o donggipa Sonja Wildlife Rescue Centre-ni hurorangko Ri Bhoi a·jani Umtrew Zoo-ona apjitna miksongenganiko Sukrobar salo A·chik Holistic Awakening Movement (AHAM) jegalatenba, a·dokni Chief Minister Conrad K Sangma-na sedoattaiaha.
Kobor on·ani gitade, November-ni 14 tariko Shillong-ni Secretariat-o iani bidingo tom·aniko ong·atangtaiaha aro ia tom·aniona Sonja Wildlife Rescue Centre-ni officer-in-charge-koba okamataha.
Ia rescue centre-o donenggipa hurorangko gipin biapona apjitangna miksongenganiko jegale Chief Minister-na sedoatengon, ian badiaba manderangni man·gnina dakdraanisa ong·enga ine AHAM-ni president Georgeprince Momin parakataha.
“Ia pilakan Umtrew Zoo-ko kulina miksonganisa ong·enga maina ia Zoo-o matburingrangko gapatna nangengani gimin Sonja Wildlife Rescue Centre-o naljokatako man·enggipa hurorangko ra·angna miksongenga. Mongsonggipa miksonganide ia Zoo-ona Giraffe aro gipin matburingrangko ra·bana gita ia rescue centre-ni hurorangko bodolskana jotton ka·enga. Mitam manderang an·tangtangni man·gnina jekoba dakna kusi ong·aia indiba chinga iako ong·na on·jawa,” ine Chief Minister-na sedoatgipa chittio AHAM-ni president parakataha.
