SHILLONG: Me·jamangmang matchotanggipa Gambegry by-election-ko chena gita NPP, sorkarini bilrangko jakkalaha ine matnanganiko National People Party (NPP) raken jegalaha.
“Ian politics-ni bewal ong·a, jensomoio saoba an·tangtangko chejawaha ine nikode matnanganirangde nakattelaia. Tangkaba satbo, a·dokni jedakgipa bilrangkoba jakkalbo vote-kora sriksrik an·tangtangsa an·tangtangni namnikana puonengani gimin darangkoba drana man·ja aro uan manderangni skaosa pangchaka” inenba Cabinet Minister aro NPP dilgipa Rakkam A Sangma aganaha.
Gambegre by-election-o chena gita National People’s Party, a·dokni bilrangko jakkalsretaha aro tangka satna gita police escort garirangko jakkalaha ine Congress MP aro Gambegre-ni gitcham MLA, Saleng A. Sangma re·anggipa Mongolbaro NPP-ni kosako matnange aganahachim.
“Iako matchote agansrangatnara gualani ong·gen, Congress election-o ama cha·gnok ua chanchiengnaba donga aro ian uni ama cha·aniko ra·chakani gitaba ong·gen,” ua aganaha.
Election-o somoio tangkarangko sataha ine party-ni kosako matnanganiko jegale aganengon, “Bebegita chinga indongarangko dakode ia pilakkon nirokna gita an·chingo election commission donga. Ian manderangni skaosa pangchaka aro uamang dingtanganiko nangnika,’’ ine Sangma aganaha.
“Tangka paisa suala ingipani bidingo uo maiba sakki dongama? Maming sakki dongjaode uan tol·gipasa ong·aia. NPP-ni tangkako seke ra·aha ingipa maming mingsa a·selkoba knaja aro nikja. Indakani maming katta-koboran dongjaode uana pangchakani gri aro aganritingako knaaigipasan,” ua agandapaha.
Indake meja mangmang matchotanggipa Gambegre by-election-ko chena gita tangka-paisrangko sataha aro sorkarini bilrangko jakkalsretataha ine NPP-ni kosako BJP aro Congress party-rang matnangtokengachim.
