SHILLONG: Mikkang bilsio ong·nasienggipa KHADC aro JHADC election-rangna party candidate-rangko parakatanio Voice of the People Party (VPP)-ni gisepo adita meligrikgijani ong·katahaon, MPSC-ni golmalrangko namatani bidingo party aganbatengon, uana batede party-tango so·sojengjeng ong·aniko namatchengbo ine North Shillong MLA, Adelbert Nongrum aganaha.
“Meligrikgijani ja·pangara maia? Iakon rongtalgipa politics ine na·a aganengama? MPSC-ni neng·nikanirangko namatna na·a skanggipa dakgrikana batede an·tangni noktangni neng·nikanirangkon namatchengbo. Ka·sae dakaniara nokonin a·bachenga,” Nongrum aganaha.
Strong Pillar Kharjana-ko, Mawkhar-Pynthorumkhrah constituency-oni party-ni gita susaatna biming mingani gimin suk ong·gijaniko parakengon, “Anga namen kusi ong·ja maina uamang (VPP) angoni chel·angenga. Saksa MLA ong·oba uamang angko maming saloba sing·chengjaha. Candidate-rangni list-ko tarion angko grongbo ine anga a·bachengaonin State Executive Committee (SEC)-o aganachim,” Nongrum aganaha.
Ua agana je, Strong Pillar Kharjana, Jaiaw constituency-oni susana tikit bi·gipasa ine SEC-ni skanggipa tom·anion agana party-na u·iatachim, indiba jensomoion candidate list-ko parakata uno Kharjana-ko Mawkhar-Pynthorumkhrah constituency-osa party candidate dake donataha ine ua namnikgijaniko parakaha.
Ua aiao inmanan baksa kusi ong·gijaniko parakengon, “Ian DSC-ni porikka ong·atgipako seani ja·mano MPSC-ni result-ko parakata gitasa ong·aiaha,” Nongrum aganaha.
Anga niamo re·gipa ong·a aro uni gisikoniko aganna maming jajrengani dongja aro iakon anga a·bachengaonin party-o aganachim inengon, “Jeba ong·china, anga manderangni skanina pakwata, anga constituency-o bilsi 17-na MLA aro MDC ong·aha aro anga angni manderangko dilsretaniona sokatangna nangja” ine VPP dilgipa saksa aganaha.
Iarangni bidingo party-oni maikoba aganchaknaba donga indiba anga MDC-ni gimin da·o aro mikkangchiba mamingkoba agangija jrip dongaignok,” Nongrum suk ong·gija aganaha.
Unomitingo VPP-ni kobor on·timgipa Batskhem Myrboh baksa agangrikaton, “Talatani bidingode North Shillong constituency-ni manderang agangrikchina” ine aganchakataha.
Re·baenggipa bilsio ong·gnigipa MDC poll-rangna VPP, re·anggipa somoio Khasi Hills Autonomous District Council (KHADC)-na sak 27 aro Jaintia Hills Autonomous District Council (JHADC)-na sak 24 party candidate-rangko mingparakataha.
