TURA: Information Commission-ni ge·etaniko manijaha ine matnangatenba, Shillong-o donggipa Directorate of Health & Family Welfare-ni PIO-ni kosako rakgipa ja·kurangko de·china, Williamnagar-ni social activist Nilbath Ch Marak, Chief Information Commission-ko didiataha.
Iani bidingo Shillong-o donggipa Chief Information Commissioner-na seachi badi ka·doatengon, uni RTI ka·anina somoi gita aganchakaniko on·jahani gimin sal 15-ni gisepon gong 3000 daiko gamchina gita department, District Medical & Health Office-ni PIO-na ge·etaniko on·ahachim indiba ia PIO, da·alonan ia ge·etaniko chu·sokatkujaenga ine Nilbath parakataha.
“Health & Family Welfare department-ni PIO, na·simangni ge·etaniko manitelgija mesokaha aro ian kacharini ge·etaniko manija gita ong·aha,” ine Nilbath, Chief Information Commission-na badi ka·e sedoatgipa chittio parakataha.
Indake ong·engon, RTI Act 2005-ni Section 20 (2)-o pangchake, ia PIO-ni kosako rakgipa ja·kurangko de·china Nilbath, Chief Information Commission-ko didiataha.
