SHILLONG: Mikkang bilsio ong·atna sienggipa KHADC aro JHADC election-na State Election Commission (SEC)-sa bon·kame candidate-rangko tik ka·na bil donga ine Mongolbar salo, Voice of the People’s Party (VPP) talataniko on·angaha.
VPP-ni ku·wattimgipa Batskhem Myrboh-ni parakatani gitade, candidate-rangko MLA-rang recommend ka·na nanga ine VPP-ni dongimin niamrang dongja aro VPP-ni niamo gitade, party-ni state election commission-na candidate-rangko tik ka·na bil donga.
VPP-ni tikitko on·anio mikkang niteanirang donga ine North Shillong-ni VPP MLA Adelbert Nongrum-ni matnanganina aganchakaniko on·angengon, “Candidate-rangko seokanio MLA baksa agangrikna nangani dongjana gita chinga party-ni gita niam bidikko tariaha,” ine Myrboh parakataha.
Mawkhar-Pynthorumkhrah constituency-na Strong Pillar Kharjana-ko candidate dake seokna gita tik ka·ahani gimin VPP MLA Nongrum, an·tangni suk ong·gijaniko parakatahachim.
Uni iandake matnanganina aganchakaniko on·angskaengon, manderangni nangnikanirangko sandie ra·ani ja·mansa party-ni SEC, candidate-rangna tikitko on·na tik ka·a ine VPP-ni ku·wattimgipa talataniko on·angaha.
Jinma tom·e chanchirimchengani ja·mansa bimingrangko uamang SEC-na watata ineba ua talataniko on·angaha.
“Party tikit on·anikode State Election Committee-sa tik ka·ronga aro party tikitko on·anio party-ni pilak member-rangan SEC-ni kamko ra·chakna nanga,” ine Myrboh aganaha.
Mawkhar-Pynthorumkhrah aro Jaiaw constituency-na candidate-rangko seokani gimin janapatskaengon, October-ni 11 tariko ong·atanggipa SEC-ni tom·na skangan uamang pilakni bimingrangkon commission-ona ra·baaha ine VPP-ni ku·wattimgipa parakataha.
“Dilgiparang baksa agangrikchengja ba re·badea ba apsana ine state election committee-ko matnanganiara kattaan nakatja maina chinga party-ni niam bidikko ja·rikesa kam ka·a. Uni gimin anga party-ni pilak member-rangkon party-ni niam bidikko ja·rikchina didienga,” ine Myrboh aganaha.
