TURA: West Garo Hills a·jani Dadenggre sub-division ning·o donggipa Dabigre songo Jal Jeevan Mission (JJM)-ni kamrangko ka·anio niam gita ong·jahani gimin A·chik Conscious Holistically Integrated Krima (ACHIK) Dadenggre unit sing·doataha.
ACHIK Dadenggre unit-ni president Kronosh Sangma-ni u·iatani gitade, adita salrangna skang uamang Dabigre songni JJM project-ko nina re·angon, kamrangko niam gita ka·jaha aro kamrang matchotja ine nikna man·aha.
“RTI ka·e am·sandianio aganchakanirangko man·ani ja·man chinga Dabigre songona re·ange nieon, kamrangko name ka·ja aro matchotgija galchipaiaha ine chinga nikna man·aha. Chingo donggipa DPR-ni gitade, ia songni JJM project-na gong 2,37,80,000-ko hisapahaoba gong 2,21,80,000-kosan chame on·aiaha. DPR-ni gitade, ia project-ni ning·o gong 6,72,700-ni RCC pump house aro pump house-na gong 8,64,850-ni power line-ko tariani ong·achim indiba chinga ua biapona re·ange nion, ia pump house-rang dongan dongja. Chingni RTI ka·anina aganchakaniode kamrang 100 percent matchotaha ine aganchakaniko on·ahachim indiba kamrang matchotgijako chinga nikbana man·aha,” ine Sangma parakataha.
Una agreba ACHIK Dadenggre unit-ni parakatani gitade, gong 12,25,100-na hisapgipa RCC Weir-koba name rikjaha aro hisapgimin gita ong·jahachim.
“Silni gate-ko rikna gong 5,18,630 koros ong·aha aro ia apsan gate-ko rong nongnaba gong 56,287 koros ong·aha ine chingna mesokaha indiba ian ong·na amgijani ong·a,” ineba ACHIK Dadenggre unit-ni president parakataha.
FHTC-ko matchotatani bidingo janapatskaengon, “Dabigre songni ge 230 nokdangrangna chi pipe baksa chirangko sale on·na man·aha ine RTI-o janapa indiba Dabigre A·king Nokmani aganani gitade, ge 98 nokdangrangnasan distribution point-rangko on·aiaha aro ianoni ge 40 nokdangrangsan chirangko man·engkua,” ine Sangma parakataha.
Iani bidingo ACHIK Dadenggre unit, PHE department-ni Executive Engineer-na sedoatenba, ia kamko jako ra·e ka·gipa contractor-ni kosako inquiry-ko dakchina aro rakgipa ja·kurangko de·china didiataha.
