SHILLONG: Khasi Hills Autonomous District Council (KHADC) aro Jaintia Hills Autonomous District Council (JHADC)-ni election-ko re·baenggipa 2025 bilsini February 21 tariko ong·atgen ine Mongolbar salo a·dok sorkari parakataha.
A·dokni Deputy Chief Minister aro District Council Affairs (DCA) Minister Prestone Tynsong-ni kobor ra·timgiparangna parakatani gitade, KHADC aro JHADC election-ko ong·atna DCA department-ni proposal-o pangchake, Cabinet-ni ku·pattianiko a·dokni Governor ra·chakangaha.
KHADC aro JHADC election-na gazetted notification-ko January 27 tariko on·gen, nomination file ka·ani bon·kamgipa tarikara February 3 tarik ong·gen aro ia apsan salon nomination lekkarangkoba scrutiny dakenba, nomination-rangko ra·pilani bon·kamgipa tarikara February 4 tarik ong·gen ineba DCA Minister parakataha.
“KHADC aro JHADC election-na pu·onaniko February 21 tariko ong·ate, result-rangko February 24 tariko parakgen,” ine Tynsong aganaha.
Model code of conduct (MCC)-ko ra·gatani bidingo sing·on, January 27 tarikon u·iataniko on·engahani gimin ia apsan salonin MCC-koba ra·gatanggen ine Tynsong parakataha.
