SHILLONG: Meghalaya a·doko bobil dake chakatenggipa Hynniewtrep National Liberation Council (HNLC) dolko tom·tomaona re·bapilna gita sorkari baksa agangrikna re·bapilchina a·dokni Deputy Chief Minister aro Home Minister (Police) Prestone Tynsong didiattaiaha.
“Anga an·tangba aro sorkarini palba uamangko (HNLC), agangrikna re·bapiltaichina mol·molatenga,” ine Tynsong aganaha.
“Uamang (HNLC)-ni sorkarina seatgipa chittion uamang maming niam gri agangrikna kusi ong·aniko parakmanahani gimin chinga uamangko agangrikna re·bapilchina nangnikenga. Uamang baksa chang bonga ba chang chikking agangrikna nanggenchimoba chinga uamang baksa chanchirimna kusi ong·aigen,” ine Deputy Chief Minister aganaha.
Sorkari baksa skanggipa changna agangrikani gisepon, tom·tomanina agangrikaniko HNLC bobil dolni ra·pilahani giminba ua an·tangni suk ong·gijaniko parakataha.
“Indake ong·genchimoba sorkari baksa agangrikna da·oba do·gako oe donengkua ine anga gisik ra·ataniko on·piltaina ska. Chinga a·dok sorkari aro ma·mong sorkari dolgnian, maming niam donagri uamang (HNLC) baksa agangrikna kusi ong·enga. Anga bebera·a, iandakgipa agangrikanirangchisa pilak dolrangan ma·sigrikaniona re·bana man·gen,” ine Home Minister aganaha.
HNLC bobil dolni aganchakanina sorkari sengkuenga ine janapatengon, HNLC bobil dolko niam pe·gipa dol ine champengataniko ra·dodapatahaoba HNLC baksa ma·mong sorkari agangrikna gisik nanganiko mesokkuenga ine Tynsong parakataha.
“HNLC bobil dolni kosako champenganiko ra·dodapatahaoba, uamangko ma·mong sorkari agangrikna okamkuenga aro chingaba uamangna do·gako oe donenga,” ine Tynsong aganaha.
