SHILLONG: Re·baenggipa February jani 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-na Sombar salo, United Democratic Party (UDP)-ni gnigipa candidate list-ko parakataha.
Ia gnigipa list-o UDP, JHADC election-na sakdok aro KHADC election-na sakgittam candidate-rangko man·chape gimik saksku candidate-rangko parakataha.
JHADC election-na parakatgipa UDP-ni sakdok candidate-rangara, War East constituency-na Medling M Swer, War Central-na Kat Kassar, War West-na Shlur Lamin, Nartiang Wahiajer-na Rimilanky Synnah, Musniang Rangad-na Wailad Siangshai aro Mynsngat Khanduli constituency-na Damian S War ong·a.
KHADC election-na parakatgipa UDP-ni sakgittam candidate-ranga, Langkyrdem Laitkroh constituency-na Ryngkatlang Lyndem, Mylliem-na Gilbert Laloo aro Mawsynram constituency-na Suly Lyngdoh ong·skaa.
Ia candidate-rangko UDP-ni president Metbah Lyngdoh-chi dilenggipa party-ni state election committee (SEC) ra·chakangaha.
Ia candidate-rangko parakatanio UDP-ni president Metbah Lyngdoh jinmana aganprakengon, dingtang dingtang constituency-rangni ku·pattianirango pangchake ia candidate-rangko ra·chakangaha ine parakataha.
UDP-ni gittamgipa candidate list-ko da·o antisani gisepon parakatgen ineba Lyngdoh aganaha.
Ia candidate-rangni bimingrangko UDP-ni general secretary Jemino Mawthoh parakatani ja·man ia candidate-rangko Lyngdoh-ni jakchi rimchaksoaha.
Ia candidate-rangko parakatanio dongpae bak ra·anggipa UDP-ni gipin dilgiparangara, Cabinet Minister Paul Lyngdoh, MLA Lahkmen Rymbui, MLA Matthew Beyondstar Kurbah, MLA Olan Sing Suin aro gipinrang ong·a.
Iana skang, re·anggipa December-ni 13 tarikosan, KHADC aro JHADC election-na UDP-ni sak 26 candidate-rangko parakatahachim.
