SHILLONG: Re·baenggipa January 10 aro 11 tarikrango salgnina Cabinet Retreat-ko Sohra-o ong·atenga aro ia Cabinet Retreat-ko ong·atanio, a·dokni Chief Minister Conrad K Sangma, Cabinet minister-rang aro sorkari official-rangba bak ra·anggen.
Ia Cabinet Retreat-ko ong·atani miksonganiara dingtang dingtang sorkari department-rangna, an·tangtangni program-rangko mesoke on·na aro dingtang dingtang neng·nikanirangko apsan chanchirime miksonganirangko chu·sokatna chol on·anian ong·enga.
Ia Cabinet Retreat-ko ong·atani bidingo kobor ra·timgiparangna talate on·angengon, ia Cabinet Retreat-ko dingtangmancha January 10 tariko kontagnina Cabinet tom·anichi a·bachengatgen ine Mongolbar salo, a·dokni Chief Secretary DP Wahlang parakataha.
Kontagnimangna Cabinet tom·ani ja·man Cabinet Retreat-ko joljol ong·atanggen aro iano pilak department-rangan Cabinet membor-rang baksa apsan asongenba, ia 2025 bilsina an·tangtangni tarisamsogimin program aro miksonganirangko talate on·anggen ineba Wahlang aganaha.
Ia Cabinet retreat-ko ong·atanio Cabinet membor-rang, songadam nokadamrango donggipa self help group (SHG)-rangkoba grongegen aro January 11 tariko, Nongriat aro Laitkynsew jolrangchipakba re·anggen ineba Chief Secretary parakataha.
Ja·mano attamchibara, Cabinet membor-rang, dingtang dingtang department-rang baksa Sohra-o tom·aniko ong·atangtaigen ineba ua aganaha.
“Uni gimin ia program-ko ong·ataniara political aro administration dolgnichipaknin ia 2025 bilsio dingtang dingtang department-rang maiko dakna miksongenga, uko ma·sie ra·anian ong·enga,” ine Wahlang aganaha.
Bilsiantian ia Cabinet Retreat-ko sorkari ong·atna miksonganirang dongama ine sing·anina aganchakaniko on·angengon, ia bilsio ia program-ko ong·atani chu·sokgipa ong·ama ong·ja uko nichenggen aro chu·sokgipa ong·a ine nikgenchimode mikkang bilsi aro ja·manrangoba ong·atani cholrang dongaia ine Chief Secretary parakataha.
