Umiam ICAR-NER-ni bilsi 50 gapaniko mania
SHILLONG: Ri Bhoi a·jani Umiam-o donggipa Indian Council of Agricultural Research (ICAR) North Eastern Region (NER)-ni bilsi 50 gapaniko Bristibar salo maniangaha aro ia manianio, Union Agriculture & Farmers Welfare Minister Shivraj Singh Chouhan, a·dokni Governor CH Vijayashankar, a·dokni Chief Minister Conrad K Sangma, a·dokni Agriculture & Farmers Welfare Minister Ampareen Lyngdoh aro gipinrangba dongpae bak ra·angaha.
Ia ICAR-North Eastern Region (NER)-ko 1975 bilsini January 9 tariko a·bachengatahachim aro ian India a·songni salgro salaram jolrango game ge·e cha·enggipa manderangni janggi tangani gadangko tang·doatna gita kamrangko ka·engachim.
Ia manianiona India a·songni President Droupadi Murmu-ba re·bae bakko ra·ani ong·achim indiba mikkarang simdimani a·selo ua re·bana man·jae, video gita jinmana aganprakatskaaha. ICAR-NER-ni bilsi 50 gapanina ua an·tangni namgipa skaniko parakataha aro game ge·e cha·enggipa manderangni namgnina kamrangko ka·angkuchina gita ICAR-ko didiataha.
Ia tom·anio, Union Agriculture & Farmers Welfare Minister Shivraj Singh Chouhan, jinmana aganprakangskaengon, game ge·e cha·enggipa manderangni nanganirangko chu·sokatanio ICAR, a·dok sorkarirang aro agricultural university-rangni gisepo nangrime kamrangko ka·na nangani gimin aganangenba, game ge·e cha·giparangni nangani kri cholrangko tarie on·china didiangaha.
Jagittamprakon apsan tom·e chanchirimenba, gama ge·anirangko namdapatna gita ja·kurangko de·china gitaba Union Minister, ICAR, a·dok sorkari aro Agricultural University-rangko didiangaha.
Ia tom·anio a·dokni Chief Minister Conrad K Sangma-ba jinmana aganprakengon, India a·songni salgro salaram a·dokrango dakchakanirangko man·jaengani a·sel gama ge·ani kamrango neng·nikanirangko chagrongna nangtokenga ine salgro salaram a·dokrango gama ge·anirangko namdapatna gita pilak nanga dakchakanirangko on·china ma·mong sorkariko didiangaha.
Salgro salaram a·dokrango a·songni mongsonggipa me·su samjakrang, me·gimurang aro bija bitchirangko man·a ine janapatengon, dingtang dingtang neng·nikanirangko chagrongna nangengani a·sel, gama ge·anirango chu·gimik cholrangko jakkalna man·jaenga ine Sangma parakataha.
“Salgro salaram a·dokrango dingtang dingtang gama ge·ani bosturangko man·na ama aro ia bosturangko a·songni gipin bakrangonaba watatna man·genchim indiba game ge·e man·gipa bosturangko ka·sine rakkina gita cholrang chu·ongjani a·sel, ia bosturangko gipin biaprangona watanio neng·nikanirangko chagrongna nangenga,” ine ua aganaha.
Gama ge·ani kamrango dingtang dingtang neng·nikanirangko chagrongna nangengoba salgro salaram a·dokrango man·gipa anaros, komila, e·ching aro holdirangko Europe aro UAE a·songrango palna sim·na man·enga ineba Chief Minister aganaha.
