SHILLONG: Re·anggipa January-ni 10 aro 11 tarikrango salgnina Sohra-o ong·atangani ja·man, sorkarini dingtang dingtang department-ni gisepo nambate chanchirimna aro kamrangko ka·na man·na gita Cabinet Retreat gita dakgipa program-rangko ong·atjringna sorkari tik ka·angaha.
Iani bidingo kobor ra·timgiparangna talataniko on·angengon, iandakgipa retreat-rangko ong·atanichi sorkarini kamrangko ning·tubate agan-chanchirimna aro dingtang dingtang department-rangni kamrangko nambate ma·sie ra·na cholrangko man·a ine a·dokni Social Welfare Minister Paul Lyngdoh parakataha.
“Ia Cabinet Retreat-ko ong·ataniara sorkarina mikaoatani gita ong·aha aro chinga iandakgipa session-rangko ong·atjringna tik ka·aha. Ia Cabinet Retreat-ko ong·atanio dingtang dingtang department-rangni kamrangko nipilanio chinga maming somoina neng·nikani gri chanchirimna man·aha. Uni gimin mikkangchiba iandakgipa program-rangko chinga ong·atjringna tik ka·aha,” ine Lyngdoh aganaha.
Ia Cabinet Retreat-ko ong·atanichi mongsonggipa namgniara a·dokni economy-ko mangrakbatatna gita tourism-ko tang·doatna tik ka·anian ong·aha ineba ua aganaha.
Tourism department-ni gamchatgipa ong·ani bidingo janapatengon, “Tourism-an a·dokni economy-ko bilake rakkianio mongsonggipa bak ong·a aro 50,000-mangni gita manderangna namgnirangko on·enga. Ia manderangni nokdangrangko man·chapata ong·ode Tourism department-ara, lak 2.5-na baten manderangna namgnirangko on·enga,” ine Lyngdoh aganaha.
Ia sal somoirango tourist-rang bang·en a·dokona re·baengani gimin dangdike on·ani kamrangko namdapatna sorkari miksongenga ineba Tourism Minister parakataha.
Skanggipa Cabinet Retreat-ko ong·atna Sohra-ko seokahani gimin talataniko on·angengon, ia biapni nitoani aro rotogipa ong·ani gimin skanggipa Cabinet Retreat-ko Sohra-o ong·atna tik ka·aha ine Lyngdoh aganaha.
Ia Cabinet Retreat-o chanchirimanggipa minggipin mongsonggipa kamara, Integrated Child Development Scheme (ICDS)-ni ning·o Anganwadi centre-rangni chu·ongjaengani gimin ong·aha ineba Lyngdoh aganaha.
“Meghalaya a·doko dam 1200 Anganwadi centre-rang chu·ongjaenga, uni gimin Anganwadi centre donggijagipa songrango da·o sanchakram biap dake jakkalenggipa centre-rangko jakkalskana Social Welfare aro Health department-rang, proposal-ko on·aha,” ine ua aganaha.
