SHILLONG: Meghalaya-ni State Anthem-o Jaintia Hills-ni ‘Pnar’ ku·sikkoba chapna gita Budbar salo Cabinet tom·e ra·chakangaha.
Ia State Anthem-ko 2024 bilsio Meghalaya a·dokni bilsi 52 gapaniko maniani bak gita tarichengahachim aro da·o dipet ia Anthem ba a·dokni ring·anio Khasi aro Garo ku·sikkosan jakkalengkuachim.
Indake ong·genchimoba, ia State Anthem-o Pnar ku·sikkoba chapatchina gita Jaintia Hills-ni dilgiparang aro a·jao songdongenggipa manderang sorkariko didiahani gimin Budbar salo Cabinet chanchirimenba, ia ring·anio Pnar ku·sikkoba chapna ra·chakangaha.
Ia State Anthem-o da·o Khasi, Garo aro Jaintia jatgittamni ku·sikrangkon chapna tik ka·angaha ine u·iatengon, ia taridapgipa ring·aniko Jaintia Hills-ni Wahiajer-o ong·atenggipa Meghalaya Games 2025-ko do·ga oani somoio jinmana ring·e mesokanggen ine a·dokni Chief Minister Conrad K Sangma parakataha.
“Jaintia Hills-ni dingtang dingtang dilgiparang, mongsongbate an·chingni Deputy Chief Minister Sniawbhalang Dhar, gipin Cabinet Minister-rang aro a·jao songdongenggipa manderangba ia a·dokni ring·anio Pnar ku·sikko chapatchina nangnikahani gimin Cabinet, Meghalaya State Anthem-ko taridapna tik ka·aha. Ia ring·anio Pnar ku·sikkoba bang·gija on·dapna chinga nangnikaha. Ia taridapgipa ring·aniko Meghalaya Games-ni somoio jinmana oprakanggen,” ine Chief Minister aganaha.
Skanggipa tarichenggipa State Anthem-ko Shillong Chamber Choir-ni Neil Nongkynrih sagi tariahachim aro ia ring·anio jatni doka dam·anirangchi Shillong-ni Summersalt aro Tura-ni Nokpante dolrang tariskaahachim.
Ia ring·anio English kattarangko Neil Nongkynrih sagi aro a·dokni Arts & Culture Minister Paul Lyngdoh tariaha, Garo kattako Iris Watre Thomas aro Khasi kattako Summersalt-ni Kit Shangpliang tariskaahachim.
