SHILLONG: Umiam-oni Shillong songjinmaona dakbagipa rama apchonani a·sel garirang apchangketanichi, songre songgabatenggipa manderang neng·nikanirangko chagrongna nangtokengani gimin ia ramako apalbatate tarina gita a·dok sorkari manchiengon, ia ramako tarina ma·mong sorkariba ra·chakangaha.
Umiam-oni Shillong songjinmaona dakbagipa rama apchonani a·sel ia ramao gari gorarang, mongsongbate dal·dalgipa garirang re·ruraanio neng·nikanirangko chagrongna nangrongengachim.
Indake ong·engon, Sukrobar salo a·dokni Deputy Chief Minister aro PWD (Roads) Minister Prestone Tynsong, da·o ka·enggipa project-rangko nieani ja·man, ia ramako tarina gita ma·mong sorkari proposal-ko ra·chakmanaha ine parakataha.
Ia ramako apalbatate tarina gita ma·mong sorkari ra·chakmanaha aro ramako tariani bidingo bakan sorkari, agan-ku·pattitimgiparang baksa chanchirimgnok ine PWD Minister parakataha.
Tynsong-ni talatani gitade, ia gital ramako tarianio maming neng·nikanirang dongjana gita Umiam Dam-ko nappakgija dingtang biap gita tariskana miksongenga.
Da·o dipet Guwahati-oni taribagipa four-lane rama, Umiam-onasan sokkuaiengachim indiba uni ja·man Shillong-onade ramarang apchonani a·sel gari gorarang apchangket ong·e neng·nikanirangko chagrongna nangengachim.
Ia ramako apalbatate tarianichi manderangni songre songgabatani somoikoba bakkandikatgen aro ia ramako ta·raken tarina nangenga ine a·dokni Deputy Chief Minister aro PWD Minister aganaha.
Indake ong·engon, Umiam-oni Jorabat-ona dakanggipa four lane ramako six-lane rama tarina gitade da·o dipet nangchongmota ong·kujaenga ine ma·mong sorkari parakatskaaha.
Umiam-oni Shillong-ona four lane ramako tarian baksana Umiam-oni Ratacherra-ona gong kror 25,000 ong·gipa ramako tarina gitaba sorkari rake kamko ka·enga.
Ia Greenfield project-o manderang ta·rakbate songre songgabatna man·na gita ia ramako, songrang gita ong·gija aro Shillong Bypass-koba nangategija tarina miksongenga.
Indake ong·engon, ia apsan salon, Shillong-Dawki Road Project, Western Bypass, Tura-Dalu rama, Dainadubi-Williamnagar rama aro gipin project-rangkoba sorkari nipilangaha.
