Shillong: Federation of Khasi Jaintia & Garo People (FKJGP), North Khasi Hills District, Sonibar salo Parish Hall Nongpoh-o 2025-28 term-na gital seokgipa office bearer-rangna ku·mitchetani program-ko ong·ataha.
Ku·mikchetaniko ong·atani somoio gital seokgipa dilgiparangara, President-na Luistar Lyngdoh, Generala Secretary-na Ricky Majaw, Senior Vice President-na Lumlang Mawnai, Vice President-rangna Shanlang Diengdoh, Centrewell Dolloi, aro Marshal Diengdoh, Assistant Secretary-rangna Artison Khongstid aro Gabriel Sun, aro Chief Organising Secretary-na Kitborlang Suting, aro gipin executive member-rangba ku·mikchetaha. General Secretary Eldie Newton Lyngdoh, Nongkhrai-ni Moses Syngkli, Lyngdoh, aro organisation-ni mongsonggipa dilgiparang aro member-rangni dongpaanio FKJGP Central Body President Dundee Cliff Khongsit-chi ku·mikchetaniko dakdilangaha.
Bilsi 53-na chu·gimik a·dok man·genchimoba a·dokni kam ka·arang namen ja·manchakengani bidingo gisiko nangbate uni katta aganani somoio Dundee Cliff Khongsit aganaha. Meghalaya a·dok skang ong·e kam ka·angani pal batesa kisangchipakna re·angenga, dingtangmancha poraia skianio, sana bananio ja·manchakenga ine ua kan·dike talatangaha. A·dokni sana banani a·barango kam ka·aniko Khongsit jee aganangaha, medical service-rangko man·e dange cha·giparangnasan man·aia, indiba tangka paisani gita bilgrigipa jatrangkode galchipaia.
Civil Hospital-o MRI machine kam ka·srangja jekon batanggimin bilsi 5-na chalaichipgija donchipa ian manderangna u·iatna namgipa mesokani ong·enga ine ua aganaha.
Poraia skiani a·bao, 1990 bilsionin a·dok komirikrikangenga, jensalo Meghalaya salgro salaram a·dok gimikoni chatro chatrirangna damsa hub ong·achim ine ua aganaha. Da·alo a·dok janggilchipaknasa ga·akangengaha, Assam a·dok dingtang dingtang a·barango namen tang·doaniko man·angengaha, ine ua aganaha.
Dingtangmancha ja·manchakgipa aro bilgrigipa manderangni bilna dakgrikangna FKJGP-ni dilgiparang aro member-rang daiko ra·na nanga ine ua didiangaha. Dilgipa ong·ani gamchataniko ua talatangaha, jeon dangdike on·a tarie donggipa ong·ma aro community-ko chel·chakna, janggitangko on·chakna nanggenchimoba jekai pattoko donganirang ine ua aganaha. Community-ni jedakgipa nangnikanirangna chel·chakgipa ong·na aro bilchamra·timgipa ong·e kam ka·angna FKJGP-ni member-rangko tarie dongchina aro mikrake dongchina ua okamaha.
