Ia bilsioba load shedding ka·jawa: Conrad
TURA: Tura songjinmao china neng·nikaniko namatna gita Sombar salo, Greater Tura Urban Water Supply Scheme-na pangchakaniko, a·dokni Chief Minister Conrad K Sangma-ni jakchi Tura-ni District Auditorium-o songe on·angaha.
Ia Water Supply Scheme-na pangchakaniko songe on·anganio, a·dokni Chief Minister, jinmana aganprakangengon, ia project-na pangchakaniko songna man·ahani gimin Public Health Engineering (PHE) Minister, department-ni Principal Secretary aro dingtang dingtang official-rangko mittelpilangenba, ia salara Tura-o songdongenggipa manderangna gisik ra·beani sal ong·enga ine parakangaha.
Ia project-ko a·bachengna gita 2004 bilsio, Tura-ni gitcham MP aro Lok Sabha-ni gitcham Speaker PA Sangma sagi, chanchiani ong·katchengaha ine janapatengon, Tura jillao china neng·nikanirangko man·rongani gimin ia project-ko a·bachengatna nangtelenga ine nikenba krenge kamko ka·na a·bachengaha ine Chief Minister aganaha.
“Ia project-ko 2018 bilsion a·bachengatani ong·achim indiba dingtang dingtang neng·nikanirangko chagrongna nangahani a·sel a·bachengatna man·chipjaha. Indake ong·genchimoba, ma·mong sorkarini tangka paisarangko dakchakanichi ia gong crore 400-mang ong·gipa project-na da·alo pangchakaniko songe on·na man·aha aro ia project-ko ja 24-oni ja 36-ni gisepon matchotna sienga,” ine Chief Minister aganaha.
Ia project-na dam-ko rikahaode mitam biaprangko chirang mripnaba donga ine janapatskaengon, ia kamo bakrimaniko aro pilak nanga dakchakanirangko on·china gita Chief Minister, nangchakegipa songni Nokmarangko didiataha.
Jolo songdongenggipa manderangni bakrimani gride iandakgipa scheme-rangko ra·gatanichi chu·sokgipa ong·na man·jawa ine janapatengon, mikka chi brachakgipa biaprangko ripinge rakkichina aro iandakgipa biaprangko tange rakkianio, nangchakegipa department-rang baksa bakrimchina ua, dingtang dingtang songni aro gittimni manderangkoba didiangaha.
Re·anggipa bilsi dipet a·doko load shedding ka·ani ba somoi gita bijoli kimitaniko dontongatahani gimin ia bilsioba apsan daken load shedding-ko ka·jawa ineba ia tom·anio Chief Minister parakataha.
“A·doko bijoli aro chirangko chu·onga gita manderangna on·na sorkari jotton ka·engani gimin ia bilsioba sorkari, load shedding-ko ka·taijana miksongenga,” ine Sangma aganaha.
Ia tom·anio, a·dokni PHE Minister Marcuise N Marak-ba jinmana aganprakengon, Tura-o songdongenggipa manderangni namgnina ia Greater Tura Urban Water Supply Scheme-ko a·bachengatahani gimin a·dokni Chief Minister-ko mittelpilangaha.
Ia tom·anio, PRIME Tourism-ni garirangkoba seoka man·gimin manderangna Chief Minister-ni jakchi pakwate on·angjolaha.
Ia tom·anio, JJM aro Greater Tura Urban Water Supply Scheme-ni jawilwatrangkoba jinmana mesoke on·angaha.
Ia Water Supply Scheme-na pangchakaniko songanio dongpae bak ra·anggipa gipin manderangara, Meghalaya sorkarini Principal Secretary Syed MA Razi, PHE-ni Chief Engineer BM Lyndem, West Garo Hills-ni Deputy Commissioner Jagdish Chelani aro gipinrang ong·a.