SHILLONG: Adita salrangna skang, a·dokni Chief Minister Conrad K Sangma-ni pangchakaniko songe on·anggipa Greater Tura Urban Water Supply Scheme-ko ra·gatanichi Tura jillao songdongenggipa lak 1-na baten manderang namgnirangko man·gen ine Budbar salo, a·dokni PHE Minister Marcuise N Marak parakataha.
Marak-ni parakatani gitade, ia gital Water Supply Scheme-ko ja 24-oni ja 36-ni gisepon matchotna ka·dongenga aro ian Tura songjinmao songdongenggipa lak 1-na baten manderangna chirangko sokate on·na man·gen.
Gitcham Tura Water Supply Scheme-chi Tura-o songdongenggipa manderangna chu·onga gita chirangko on·na man·jaengani gimin ia Greater Tura Urban Water Supply Scheme-ko sorkari a·bachengatenga ineba Marak parakataha.
“Tura Water Supply Scheme-na phase gittamko matchotmanaha indiba ia skanggipa aro gnigipa phase-rangko bariatani ja·manba chirangko chu·onga gita on·na man·kujaenga. Uni gisepon, Jal Jeevan Mission-ni ning·o chonchongipa songrangnaba urban water supply scheme-oniko on·na nangengani a·sel chirang chu·ongjaenga,” ine Marak talataniko on·angaha.
Ia neng·nikanirangko namatna gitasa Greater Tura Urban Water Supply Scheme ine bimingko done brigipa phase-ko a·bachengataha ine janapatengon, ia project-ni ning·o Ganol chiringni ka·machipak dal·begipa dam damsako rike, ia dam-onikon chirangko salenba, Tura songjinmani bangki dongenggipa biaprangna watgen ine PHE Minister aganaha.
“Ia project-ko matchotahaode, Tura-o songdongenggipa nokdang ge·antinan chirangko nanga gita watna man·gnok,” ine ua aganaha.
PHE Minister-ni parakatani gitade, ia Greater Tura Urban Water Supply Scheme-na gimik gong kror 398.48 tangkarangko chamenga aro ia scheme-ni ning·o Tura jillani dam 37 gittimrangko man·gopgen.
