Siju-o tourism infra-ni obosta namgijako GSU, Paul Lyngdoh-na u·iata

Baghmara:  Garo Students’ Union (GSU) Siju regional unit, Tourism Minister Paul Lyngdoh-na chittiko see, district-ni mingsinggipa tourist destination Siju-o infrastructure-rangni obosta namjani gimin u·iataha.
January 31 tariko chittiko Deputy Commisisoner-ni gita Tourism Minister-ona sokataha.
Siju Caves ba dobakkol sepango donggipa dingtang dingtang tourism structure-rangni obosta namja, infrastructure-ko name rikjaha, jeni a·sel da·ona nosto ong·angengjok ine chittio badi ka·ataha.
Siju Cave sepango tarigipa project-ara ma·mongni Tourism Ministry-ni Swadesh Darsha Scheme ong·a. Project-o kror 2.5 damni adventure park donga, bird watch tower ba do·orangko nina rikgipa tower, kror 3.16-ni interception centre, kror 2.19 damni rama aro parking, lak 50.66-ni solar illumination, aro lak 75-ni zip line donga.
“Project-ko parakatna skangan gital rikgipa infrastructure-rang nosto ong·na a·bachengaha. Name rikjani ta·raken nosto ong·aha, ian namgija bewalo kam ka·aniko mesoka. Infrastructure-ko rikna chu·onga gitan tangka-paisa dongachim, indiba ua tangkarangko name jakkaljaha ine unit-ni secretary Welbingstar Sangma aganaha.
Meja bilsi 2024 December 17 tariko ma·gipa RTI-o project matchotani certificate aro contractor-rangni kam matchote tangka bikote ra·ako nikna man·aha.
Department-ni aganchakao, zip line-ko sorkarini ra·chakanion gipin biapona jitskaha ine aganaha indiba chong·motde Siju songo iandakgipa infrastructure-an dongsrangja ine Sangma aganaha.
Uandake ia mamlako name dake am·sandina dabie Sangma, zip line-ko gipin biapona jita ine aganchakako ra·chaknan man·jaenga ine aganaha.
“Iandakgipa obostarangara jinmani tangkako jakkalsreta ong·a, unbaksana a·dokni tourism sector-na biming namgijako ra·baa. Biapko nina re·bagiparang, nama cholrangko aro nitoe rikgipa infrastructure-rangko nikna ka·donga indiba iandakgipa namgijagipa infrastructure-ko nikeaniara tourist-rangna kengni ong·a. Project-na chamgipa tangkako kra bewalo jakkalna nanga ine agandaha.