SHILLONG: State Bank of India (SBI) Williamnagar branch-o joint savings account-oni gong kror 1.46 tangkarang gimaanina Retmilla Rongdeng Sangma minggipa me·chik saksa, ia bank-ni kosako police-rangna FIR ka·doangaha.
Ia me·chikni FIR-o parakani gitade, ua an·tangni depanterang baksa SBI-ni Williamnagar aro Nongalbibra branch-rango tangkarangko chimonge donna gita joint savings account-ko kuliahachim indiba re·anggipa 2024 bilsini November 14 tariko, uamangni tangkarang, ia joint savings account-oni gimaaha ine uamang nikaha.
Tangkarang gimaani gimin bank statement-rangko nipilon, uamangni tangkarangko 2023 bilsini June 22 aro 2024 bilsini November 14 tarikni gisepo saoba oke ra·aha ine Sangma, nikna man·aha.
Ia tangkarangko SBI Williamnagar branch-o clerk-ni kamko ka·enggipa Easter Momin-ni bimingo, cheque aro online gitasa oke ra·aha ineba Sangma, Williamnagar Police Station-na ka·gipa FIR-o parakaha.
Mingsa aiao inmananide, account-o link ka·gipa Retmilla Rongdeng Sangma-ni mobile number aro address-koba uamangna u·iatgija dingtangataha aro ia mobile number aro address-rangara, Easter Momin-ni details baksa meliskaaha.
Iani bidingo ua am·sandie niangkuon, withdrawal cheque-rango ka·gipa soirangba bank-o soi ka·gipa baksa melijachim indide maikai ia tangkarangko oke ra·na man·aha ineba ua FIR-o sing·doangaha.
Uni tangkarangko oke ra·aha ine nikani ja·man ia me·chik, an·tangni tangkarangko on·pilchina dabie, SBI-ni official-rangna baditana chang chittirangko see u·iatahachim aro 2024 bilsini December 16 tarikoba legal notice-ko on·aha indiba bank official-rang maming ja·kurangko de·gija, sandirokanirangko dakenga inesan una u·iataiaha.
