SHILLONG: CM Impact Meghalaya Class Readiness Program e-Books-ko Budbar salo, a·dokni Chief Minister Conrad K Sangma oprake on·angaha aro ia program-ko a·bachengatanio, a·dokni Chief Secretary DP Wahlang, Education department-ni Commissioner & Secretary Vijay Kumar, MIDC-ni Chairman James K Sangma aro dingtang dingtang official-rangba dongpae bak ra·angaha.
Ia Meghalaya Class Readiness Program-ara chatro chatrirangko mangrakbatatna aro lekka pora on·aniko bilakbatatna tarigimin program ong·a aro ia program-ni ning·o class 1-oni class 10-ona bi·sarangni dal·roroanio u·i-ma·siani aro changa sapanirangko on·na gitaba tariaha. Ia Meghalaya Class Readiness Program-ara, a·dokni pilak skulrango skigiparangna tarigimin antibrini program-ba ong·a.
Ia Meghalaya Class Readiness Program e-Book-rangko oprake on·anganio a·dokni Chief Minister, tom·anio dongpae bak ra·giparangna aganprakangengon, ru·uta somoirangonin a·doko lekka porani gadangko namdapatna gita sorkari rakbee kamrangko ka·enga ine parakatenba, lekka porani a·bao dingtang dingtang neng·nikanirang, jekai skigiparangni neng·nikani, skul nokrangko rikna nangani, skulni dingtang dingtang gadangrang dongani aro uandakgipa neng·nikanirangko chagrongna nangengoba, secondary skulni porikkarango pass ka·ani percentage-ko namdapatna sorkari krenge kamko ka·enga ine aganaha.
Ia Meghalaya Class Readiness Program-ara secondary gadangrangosan ong·aigija primary aro upper primary gadangrangoba skie ra·ani bewalko namdapatna ja·ku de·ani ong·enga ineba Chief Minister aganaha.
Classroom-rango skie ra·ani aro skie on·ani bewalrang dingtangna gita nangenga ine janapatengon, iandakgipa ja·kurangko de·anichi lekka porani a·bao sorkarini miksonganirangko chu·sokatna dakchakgen ine Chief Minister, an·tangni ka·dongchakenganiko parakataha.
Ia Meghalaya Class Readiness Program-ni bidingo, Directorate of School Education & Literacy-ni Director Swapnil Tembe-ba talate on·angengon, chatro chatrirangko dingtang dingtang gadangrango dakchake on·na gita ia program-ko NCERT-ni namdapatgipa Vidya Pravesh module-o tariaha ine parakataha.
“Skanggipa jao, pilak skigiparangan class 1-oni class 10-ona chatro chatrirangko class-rangna tarisona aro gadangsaoni gadangsaona tang·dorikrikangna dakchakna gita ia program-ko dakna nanggen,” ine Tembe aganaha.
